uMthunywa
Blessing Moyo
ABE-VETERINARY Services sebexwayise abafuye izinja ukuba bananzelele igcikwane lobhova eliyingozi ezifuyweni lasebantwini.
Ubhova ngumkhuhlane otholakala ezinyamazaneni othelelwana ngokulunywa yinyamazana elomkhuhlane lo.
Umkhuhlane wobhova wandise ukuhlasela izinja njalo udala umonakalo omkhulu esifuyweni lasebantwini.
Udokotela wezifuyo uDokotela Ndabezinhle Mkhwananzi uthe ubhova ligcikwane elingena ngamathe emzimbeni wenyamazana ngesikhathi ilunywe yinyamazana elegcikwane leli.
“Igcikwane leli lisuka lihambe ngomthambo wegazi licine selifike engqondweni okusuka kubangele ukuthi ubuchopho baleso sifuyo buvuvuke.
“Inja esilomkhuhlane lo ibonakala ngokutshintsha ekwenzeni kwayo, iyabe isilolaka ibe isikhonkotha ngendlela engajwayelekanga, okunye njalo ezinye izitho zomzimba ziyabe sezingasasebenzi ngapha isigxoza indenda kokuphela,” kutsho uDkt Mkhwananzi.
Ekucineni icina ingasakwanisi isilala kuphela kumbe iqaleke ife.
“Ngesikhathi ingasakwanisi lutho iyabe ingasenelisi ukuginya futhi labaniniyo bayabe besengozini nxa bengabamba umlomo wayo.”
Uqhubekele phambili esithi umuntu engalunywa yinja elobhova kumbe ukubamba amathe enyamazana elomkhuhlane lowu eyihlolisisa kumele abone ukuthi uyahamba esibhedlela ayekwelatshwa amanxeba lawo abe esehlatshwa i-anti-rabies le anti-tetanus ngoba ubhova ngumkhuhlane oyingozi lasebantwini, umuntu angafa kumbe aphambaniseke ingqondo.
“Abafuye izinja bangavikela umkhuhlane wobhova ngokuhlabisa izinja zabo njalo nxa becabangela ukuthi inja isilegcikwane lobhova kumele baphangise bayihlabise.
“Izinja zihlala zihlatshwa lapha koBulawayo ngabe Veterinary ukuze zivikeleke emkhuhlaneni lo.
“Izinja eziyabe zicatshangelwa ukuthi zilomkhuhlane lo thina abeVeterinary sibakhuthaza ukuthi basibize sizoyihlola, nxa isifile siyathatha ikhanda kumbe ubuchopho siyehlolisisa sisenzela ukuthi sivimbe ukumemetheka komkhuhlane lo,” kuphetha uDkt Mkhwananzi.
