uMthunywa
YiNtatheli kaMthunywa
ZISELE zibambe owangaphansi izakhamizi zeNekatambe eHwange ngemva kokuba indoda eleminyaka engu-38 yokuzalwa ibulale umalumayo, qede lapho yapheka izitho zomzimba wakhe.
Indoda le, uWish Mupande ubotshelwe icala lokubulala umalumakhe uFida Stephen Mumpande (62).
Ngokutsho kwamapholisa esabelweni seMatabeleland North, umufi wanyamalala eselusa inkomo emfuleni uGwayi mhlaka 17 Ntulikazi.
Kubikwa izihlobo zikamuyi zabikela izakhamizi ngokunyamalala kwelunga leli andubana ziqoqane kwaphunywa ijumo ukuthi adingwe. Zangena ihlathi zathola impahla zigcwele igazi entabeni ekule indawo.
Kwaphinda kwatholaka njalo ingalo yesandla senxele, umgogodla lekhanda kuphanyekwe esihlahleni. Kubikwa ezinye izitho zatholakala seziphekiwe.
Amapholisa aphinde aveza ukuthi uWish wabanjwa elehloka alisebenzisa ukubulala umalumakhe njalo kunakanelwa ukuthi kungabe kubangelwe yikungaphili kuhle engqondweni.
