uMthunywa
Listen Ndlovu
UMLIMI kumele agcine umumbu wakhe ngendlela efaneleyo ngemva kokuwukhipha engalaneni ukuze isivuno sakhe sihlale isikhathi eside.
UProvincial Agritex Officer wesabelweni seMatabeleland North, uMnumzana Dumisani Nyoni uxwayise abalimi mayelana lendlela yokugcina umumbu okhitshwa engalaneni.
Agritex
“Umumbu uvunwa ufakwe engalaneni kusenzelwa ukuthi wome usale ubumanzi bawo buyi 12,5% ukwenzela ukuthi uhlale isikhathi eside,” kutsho uNyoni.
Ubike ukuba zinengi indlela umlimi angazisebenzisa ukuhulula umumbu wakhe nxa esewukhipha engalaneni.
“Nxa elomtshina wokuhulula angasebenzisa wona loba ehulule ngezandla abize ilima.
Ukubhula kudala ukucacadeka komumbu loba abanengi bejayele ukubhula.
Nxa umlimi elomumbu omnengi angenelisa ukuqhatsha umtshina wokuhulula,” kutsho uNyoni.
“Abalimi bakhuthazwa njalo ukuthi lapho abahululela khona bafake amasaka loba iseyili ukuze umumbu ungabi lenhlabathi, ingcekeza kumbe ukhethe.
Engahululela endlini, phandle kumbe esizeni.
“Umumbu ungahululwa uyawela umlimi akhiphe ingcekeza enjengeziqu, amahlanga lotshani,” kutsho uNyoni.
Ukhuthaze njalo ukuba abalimi bathenge imithi yokufaka emabeleni ukuze kuvikelwe ubudli.
Shumba Plus
“Abalimi bakhuthazwa ukuba bathenge imithi yokuvikela ubudli efana leShumba Plus.
Imithi le isebenza ngezikhathi ezitshiyeneyo, ikhona esebenza inyanga ezintathu, omunye usebenza inyanga eziyisithupha, omunye usebenze okwenyanga eziyisificamunwe munye.
Umlimi kumele afake umuthi ohambelana lokuthi ufuna ukuwusebenzisa nini umumbu wakhe,” kutsho uMnu Nyoni.
Uphinde waxwayisa abalimi ukuthi babone ukuba isiphala lapho abafaka khona amabele kuhlanzekile.
“Umlimi kumele aqinisekise ukuthi isiphala sihlanzekile ngokusithanyela abuye asigudule.
Okunye okumele akukhangele yikuthi akunetheli yini phakathi.
“Esiphaleni kufakwa umumbu ofakwe umuthi kuvalwe ngci kungangeni umoya, lamagundwane.
Ngemva kwenyanga ezintathu umlimi uyavula isiphala sakhe ele umumbu, athanyele isiphala afake njalo umumbu abesevala futhi,” kutsho uNyoni.
