uMthunywa
OSAZIWAYO kwezemidlalo etshiyeneyo elizweni kumele baphiwe inhlonipho besaphila, hatshi ukuthi babongwe nxa sebefile.
La ngamazwi akhulunywe ngumngcinisihlalo wenhlanganiso yeSports Journalists Association- Southern Region, uLovemore Dube, kumbuthano wokungcwaba uPhilip “Striker” Ndlovu owayengumqeqetshi womdlalo we-boxing.
U-Striker ubhubhele endlini yakhe eMakokoba ngoLwesine eleminyaka engu-66 kulandela ukugula umkhuhlane wemvukuzane.
Ekhuluma ngembali yalumqeqetshi, uDube uthe banengi abadlali be-boxing abalolongwa nguStriker abenelisa ukumela iZimbabwe kunkundla, okuveza ubungcitshi ayelabo.
“U-Striker ufe engalalutho kodwa ubeyindoda ethembekileyo. Kuhle ukuthi abantu abanjengoStriker baphiwe inhlonipho losekelo besaphila,” nguDube lo.
Emngcwabeni bekulabosaziwayo bezemidlalo ababalisa intshantshu yomdlalo lo ku-World Boxing Association Pan African uThamsanqa Dube, uVincent Muziri, intshantshu kumncintiswano yeZimbabwe National Youth Games uMeluleki Ngulube, uZenzo Moyo loNokuthula Tshabangu.
@NkosieLegend