uMthunywa
YiNtatheli kaMthunywa
UKUPHUMELELA loba ukwehluleka ukufuya amathole kugxile ikakhulu kundlela umlimi akhangela ngayo amathole akhe kanye lokubakwazi kwakhe ukusukumela phezulu nxa amathole akhe engezwa kuhle.
Ukunakekela kanye lokuhlala uhlolisisa amathole akho kwenza wenelise ukubona umkhuhlane masinyane. Ukunika amathole ukudla kumele kwenziwe ngasikhathi sinye lokuyawakhangela esibayeni.
Izibonakaliso zamathole aphilileyo
Ukuze abalimi babelakho ukubona nxa amathole engezwa kuhle kumele baqale bazi ukuthi amathole aphilileyo alaziphi izibonakaliso. Lokhu kuyanceda ngoba umlimi ubalakho ukuhlala enanzelela inguquko ezincinyane ezibakhona kumathole akhe kungakabi lezibonakaliso zomkhuhlane.
Amathole ahlala egijima phakathi esibayeni ngaphilileyo. Amathole la nxa ephumule ayabe ezibuthanise umzimba amasondo awo efihlakele ngaphansi kwawo ikhanda lalo liziphumulele kahle. Amathole la ayabe ekhanya eziphumulele nje kungelalutho oluwaphazamisayo njalo eziphefumulela kuhle. Amanye amathole aphilileyo abonakala ngokuzilalela ngecele.
Okumele ukunanzelele
Kumele uhlale ukhangela amathole akho esibayeni ugxile kakhulu emakhaleni awo udinga amakhala amanzi njalo ukhangele indlebe uzibambe uzwe nxa amathole akho etshisa umzimba. Amathole agulayo andise ukuba lamakhala omileyo lomzimba otshisa okungejwayelekanga. Lalela indlela aphefumula ngayo unanzelele nxa ephufumula nzima.
Phakamisa umsila ukhangele ubulongwe bawo udinga ubulongwe obungabe bungejwayelekanga. Khangela njalo amasondo awo. Amathole aleviki kusiya kunsuku ezilitshumi ezelwe kumele akhangelwe inkaba ukuba kayivuvukanga. Ukukhangela lokhu kumele kwenziwe nsuku zonke. Amathole aphumula ejikweni lesibaya afihla ikhanda lawo kumele akhangelisiswe. Sukumisa ithole elinjalo.
Nxa usenelisa ukulelula liyabe liziphilele. Ithole elingelulekiyo likhanya lingelamandla njalo elingahambiyo ngeligulayo. Amathole nxa emi kumele indlebe zawo zikhangele phansi kunye lekhanda lakhona. Amathole kumele ahlale endaweni engela kuhlukumuzeka. Kubanzima ukunanzelela amathole agulayo nxa ehlala endaweni eminyeneyo njalo ehlala ehlukumezekile. Bana lesibaya esincane lapho okungahlala amathole angezwa kuhle. Lesi sibaya kumele sibe sikhudumala njalo kumele sihlale sihlanzwa kokuphela.
Amathole abalabo ubudlelwano labantu ikakhulu nxa kulabantu abanengi abawanakelelayo. Ukuba lobudlelwano lamathole akho kuyaphathisa ikakhulu nxa esegula ngoba uyabe ulakho ukuwancenga ukuthi adle.
