uMthunywa
Wayne Ncube
NGEMVA kokunanzelela ukuthi umphakathi ukhangelela phansi abantu abalobugoga kanye lezimuli zabo kulomlobi osekhethe ukuvula amehlo kazulu ngobugoga ngokusebenzisa ifilimu.
UMehluli Moyo oleminyaka engu-32 yokuzalwa obhala amafilimu, usebhale ifilimu ngobugoga lapho aveza khona ukuba uzulu uziphatha njani nxa ehlangane labantu abaphila lobugoga.
“Abantu abanengi balendlela embi abaziphatha ngayo nxa bethe bahlangana labantu abalobugoga, kufilimu le ngifundisa abantu ngobubi balokhu abakwenzayo njalo ngifisa bazibonele mathupha indlela abaphatha ngayo abantu abalobugoga emphakathini.
“Abantu bathatha ubugoga njenge siqalekiso, bathi nxa kulophila lobugoga kwenye imuli bathi limuli ilomnyama kukanti ubugoga bungenzakala kuloba ngubani njalo akula muntu okumele athwaliswe nzima ngoba imuli yakhe kumbe yena elobugoga,” kulandisa uMehluli.
Kufilimu le kuzalingisa umuntu ophila le-Down Syndrome ukuze kutholakale ukuthuthukisa abantu abalobugoga ngeqiniso elibonakalayo njalo sikhangelele ukudinga lemuli ephila nzima emphakathini kubangelwa yikuthi elinye ilunga layo liphila lobugoga.
“Ukuphila lobugoga akutsho ukuthi ngeke uphile impilo epheleleyo njalo efana leyabanye abantu. Umuntu usengaba lempilo enhle kodwa kudingakala ukuthi umphakathi umsekele njalo uzwisise ukuthi ungumuntu opheleleyo.
“Ifilimu le izaveza indlela abantu abagogekileyo abathola ngayo uncedo kusiya kundlela abanye abantu ababaphatha ngayo okwenza umsebenzi lo esibhekane lawo udedele muva,” kuchaza uMehluli.
“Ifilimu le ebizwa ngokuthi ‘uLwazi’ ibisiqalile ukuphekwa kodwa okwakhathesi simi nje kubangelwa yikuswelakala kwezimali. Sifisa ukuthi ngabe ukhona olesifiso sokusiphathisa ngemali asisize ukuze kuthuthukiswe ulwazi ngobugoga kungabi lomuntu okhangelelwa phansi ngenxa yesimo sakhe.”
