uMthunywa
Bongani Ndlovu
ABALIMI abafuyela ukuthengisa bakhuthazwa ukuthi babelolwazi lokunonisa izifuyo zabo ukuze babelenzuzo ephezulu nxa sebezithengisa.
Ekhuluma loMthunywa uMnumzana Tobias Moyo ongumlimi uthe ukunoniswa kwenkomo zenyama kuyibhizimusi enhle kweleZimbabwe.
“Kuqakathekile ukunonisa inkomo zingakathengiswa. Kuleli isilinganiso senyanga esifunakalayo ngenyanga singaba yi-6 500 metric tonnes ngakho umlimi othengisa inkomo zenyama ulakho ukuthola inzuzo enhle kakhulu ngemva kokuthengisa inkomo zakhe.
“Ukunoniswa kwenkomo zenyama yindlela ethatha amalanga angamatshumi ayisitshiyagalolunye zinikwa ukudla okuzenza zenelise ukuba lesisindo esikhangelelweyo,” kuchaza uMnu Moyo.
UMnu Moyo uphinde wathi okuqakathekileyo yikuzipha ukudla lamanzi endaweni eyodwa.
“Kufanele ukuthi kulungiswe indawo yokunika inkomo lezi ukudla njalo okuqakathekileyo yikuthi indawo le ibe yindawo elamanzi lokudla okwaneleyo ukuze inkomo zingahambi imango emide zilahlekelwa ngokunye ukudla emzimbeni.
“Akuqakathekanga ukuthi umlimi unonisa inkomo ezisesibayeni sakhe kumbe azithenge kwezinye indawo, okuqakathekileyo yikuthi zibe ngumhlobo ovumayo. Izikhathi ezinengi umhlobo we-hard mashona uyavuma ukunoniswa kuhle,” kutsho UMnu Moyo.
UMnu Moyo uthe inkomo ezinoniswayo kufanele ziphiwe ukudla okwakha umzimba ngesikhathi zinoniswa.
“Inkomo ezinoniswayo kufanele ziphiwe ukudla okulamandla wonke okuzanonisa umzimba ikakhulu ama-proteins, ngelanga inkomo eyodwa ingaphiwa ukudla okuyisilinganiso se-8,5kg.
“Amanzi ahlanzekileyo njalo eneleyo lawo aqakathekile ukuze inkomo zingomi. Kuthi ngemva kwamalanga angu-90 inkomo iyabe silomzimba olesisindo esingaletha inzuzo kumlimi,” kuphetha uMnu Moyo.
