uMthunywa
ZiNtatheli zikaMthunywa
KULESIPOKO selokitshini leMpopoma koBulawayo esesidlisa izakhamizi zakule indawo inkobe ezilamatshe nanko phela kubikwa kungavele kube mnyama akusahanjwa ngoba isipoko lesi sibathela ngamanzi kanye lenhlabathi, uMthunywa uyakuveza lokhu lamhlanje.
Isipoko sendoda okutholakale ukuthi nguSam nje kuphela, owayeloja ngemva kwezitolo zeMahomva obhubhe nyakenye ngoNcwabakazi kubikwa sibonakala ilanga lingatshona emkotweni ongemva kwezitolo lezi.
Kubikwa isipoko lesi sithela abantu abadlulayo ngenkonxa zamanzi kanye lenhlabathi.
UMthunywa ukhulumisane lesinye isakhamuzi sakulindawo esikhethe ukungabethwa ngegama esithe omakhelwane bathi babebona umuyi.
“Omakhelwane babekhala ngasililo sinye bethi babona isipoko sikaSam nsuku zonke ebusuku.
“USam wayeloja kwenye indlu eduzane lomkoto kuthe ngemva kokufa kwakhe kwakungasadluleki emkotweni lo kuyibunkanyankanya okwakusobala ukuthi yisipoko.
“Isipoko lesi sasithela abantu ngamanzi kanye langenhlabathi basuke sebephaphatheka ngokwethuka ngoba bengamboni umuntu obathelayo,” kulandisa umfakazi lo.
“Izihlobo zikamuyi zake zabuya lapha ngemva kokuzwa abantu besithi bayambona ebusuku kodwa zathi labo abambonayo balesazela ngokufa kwakhe,” kuchaza isakhamuzi lesi.
UMthunywa uphinde wakhulumisana lomninindlu lapho okwakuhlala khona uSam othe kazake asibone isipoko lesi kodwa bakhona omakhelwane abathi bahlezi besibona emkotweni.
“Ngihlala ngisizwa abantu besithi bayambona uSam ebusuku kodwa mina lokhe wafayo kangikaze ngimbone.
UMthunywa uphinde wakhulumisana lenina okubikwa lake lathelwa yisipoko lesi ngamanzi lenhlabathi uPatricia Mhlanga oveze ukuthi wayevela eMusina aze abone uSam.
“Ngangingangedwa ngibona isipoko lesi. Sasibanengi sezwa sithelwa ngamanzi lenhlabathi. Abanye engangilabo yibo abathi bambone emile lapho ayehlala khona. Mina ngathi nginyemukula emuva ngabona inkalakatha yelangabi lomlilo ngemva kwami. Mina ngokwami ukuthi ngingathi ngambona ukuthi nguSam ngiyabe ngiqamba amanga,” kuphetha uNkszn Mhlanga.
