uMthunywa
YiNtatheli kaMthunywa
KULOMNTWANA wesigabeni seBeatrice oleminyaka yokuzalwa emithathu oselenyanga wanyamalala kulandela ukuthwalwa yisavunguzane sahamba laye kokuphela.
Abazali bomntwana lo kanye lezinye izakhamizi zepulazini leRosyline Pattison, eMuda, balokhu betheneke amadolo njalo bezidla amathambo engqondo kulandela limpicabadala abathi kabakaze bayibone ngitsho lokuzwa ngayo.
Indaba le esansumansumane kubikwa yenzakala mhlaka 24 Mpalakazi nyakenye lapho umntwana lo amane wahluthunwa saphepha edlala labanye abantwana egumeni kwaba yikho ukunyamalala kwakhe emoyeni kuze kube lamhlanje.
Usane lolu, uKnowledge Nyamunda (3) kubikwa wanyamalala bucwadlana labazali bakhe.
Kubikwa ngesikhathi umntwana lo ethathwa yisavunguzane lesi, unina wayegezisa izitsha.
Isikhulumi samapholisa esabelweni seMashonaland East, uInspector Nobert Muzondo ugcizelele wathi amapholisa alokhu esachwayisisa ngokunyamalala kosane lolu.
“Isiga lesi sabikwa emapholiseni njalo siphakathi kokuchwayisisa ukuze sibe leqiniso lokuthi kuyini okwenzakalayo emntwaneni lo,” nguInsp Muzondo lo.
Uyise kaKnowledge, uMnumzana Herbert Nyamunda (42), uthe wayesemsebenzini aze amukele umbiko wokuthi usane lwakhe alusabonakali.
“Ngatshayelwa ucingo emini enkulu ngisemsebenzini ngunina esithi umntwana senyamalele. Ngabuyela ngekhaya ngafica ngempela umntwana engekho, ngasengibikela ezinye izisebenzi inengi lazo ezazingazange ziye emsebenzini belungiselela iKhisimusi,” kulandisa uNyamunda.
“Umntwana wayezidlalela labanye egcekeni nje. Abanye bakhe basuka sebesiyakudla ngakibo yena wasala yedwa unina uthi ngaleso sikhathi wayemkhangele.
UMnu Nyamunda uthe khonokho nje umkakhe wabona umntwana esenyamalele ethi kwakungathi uthwelwe yisavunguzane ngoba lonyawo lwakhe aluzange lubonakale.
“Le yiyo indlela umntwana lo, obelizibulo acatsha ngayo. Saqala ukudinga umntwana kusukela ngaleso sikhathi kwaze kwatshaya ihola lesithupha ilanga selikhotheme. Akula lapho esingazange simdinge khona, emadamu amabili alapha, emthonjeni kanye lemfuleni kodwa kasizange simbone.
UMnu Nyamunda uthe babikela amapholisa ngokucatsha komntwana lo mhlalokho.
Uqhubekele phambili esithi lokhu bengakakhathali ngoba lokhu besamdinga umntanabo.
“Kasikadeli, silokhu siqhubekela phambili simdinga umntanami. Emsebenzini bangikhulula bathi ngidinge umntanami. Abaphurofethi kanye lezinyanga esihamba kuzo bathi umntanethu uyaphila, ukwenye indlu khonapha enkomponi. Kuthwa ulele wembathiswe ingubo emhlophe.
“Abomoya bathi umntanami wathathwa yisavunguzane loba ngumoya wabathakathi lapho ayedlalela khona ukuze bamsebenzise imisebenzi emibi,” utsho njalo.
Kubikwa kwezinye insuku usane lolu lwaluvakatshela unina kayise, uNobetta Nyamunda kodwa mhlalokho kazange alugxobe khonale.
UMnu Nyamunda uthe udinga uncedo ukuze umntanakhe ambone, ephila loba efile.
Unina kaKnowledge, uPlaxedes Gonera (24), uthe ulokhu ebona angathi liphupho indlela umntanakhe acatsha ngayo.
“Umntwana wayedlala labanye ngimkhangele ngesikhathi ngigezisa imiganu eqeda kudla ilambazi. Abanye abantwana bamtshiya edlala yedwa.
“Ngabanjwa yisiyezi ngesikhathi umntwana ngingasamboni. Ngabona umntwana engani uthethwe yisivunguzane sahamba laye. Okwenzakala lapho angizange ngikubone umntwana wayesehambile lesavunguzane,” kutsho uNkszn Gonera.
Uthe ngemva kwesikhatshana engamboni walandisela omakhelwane bakhe baqalisa ukumdingisa umntwana.
“Zonke indawo esihamba kizo osiyazi bathi umntwana uyaphila wathathwa ngumoya wamusa kwenye indawo. Sicela usizo ekudingeni umntwana lo ngoba nguye yedwa engilaye. Umntwana lo ulebhundu esiphundu azalwa lalo,” kutsho uNkszn Gonera.
Umama lo uthi uzwa ubuhlungu ngenkulumo azizwa ziphuma kuninazala.
“Umamazala wami uthi ngizidingele umntanami. Wake wangiphendukisa esontweni yeMasowe asontela kiyo esithi umntwana ubonakale emfuleni yena ephosisa. Angazi kumbe kukhona akwaziyo,” kutsho unina kaKnowledge.
UNkszn Gonera uthe endaweni le kulamadamu amabili lemifula emine, badinga endaweni zonke lezi kodwa abamtholanga.
UGogo uNobetta Nyamunda (65) uthe uzwa ubuhlungu kakhulu ngokulahleka komzukulu wakhe.
“Umzukulu wami ngacina ukumbona mhlaka 22 Mpalakazi esithi ngimphekele i-rice, ngemva kwalokhu angizange ngimbone. Ngamangala sengibona abantu benkomponi bebuya emzini wami ukuzodinga endlini besithi yimi engithethe uKnowledge. Bangena emakamelweni ami onke womathathu bamswela,” kutsho ugogo kaKnowledge.
Lapho abaya khona kuthiwa umntwana usaphila njalo usendlini.
“Ngilabantwana abangabafana abathathu, bengifisa ukuthi imuli yami ikhule,” kutsho ugogo kaKnowledge.
UNkszn Tungamirai Maphosa (46), ugogo ozala unina kaKnowledge, uthe indaba le eyenzakele kumzukulu wakhe imethusile kakhulu.
“Kwakungesonto ngesikhathi ilanga selisiya gwaza umhlaba ngigeza ngabuzwa ukuthi uKnowledge usemzini wami yini, ilizwi leli langihlaba ngaphakathi, kwatshaywa insimbi, abantu baziswa ukuthi kulomntwana olahlekileyo abantu baqala ukumdinga. Kuze kube lamhlanje umntwana kakatholakali,” kutsho ugogo uMaphosa.
UNkosazana Annah Chifula laye ohlala enkomponi le uthe selokhu umntwana lo wanyamalala sebesesabela abantwababo.
“UKnowledge wayedlala labantwabami ngalelolanga. Angikholwa ukuthi wabulawa, abantu bafuna ukumsebenzisa ekuloyeni,” kuphetha uChifula.
Abafuna ukuncedisa bangamthinta kunombolo ezilandelayo. 0784 755 027 / 0779 047 689 / 0785 467 511.
