uMthunywa
Ukudla kwekuseni
Ilambazi
Ukudla kokuqeda ubuthongo (ibreakfast). Lokhu kudla kuqakathekile ngoba kuqeda ubuthongo besekusipha abantu amandla okwenza imisebenzi eyehlukeneyo, enzima lelula. Abantwana abaya ezikolo ezikhatshana leziseduze labasekhaya abenza imisebenzi eyehlukeneyo.
Okhokho labo babesazi ukuthi kufanele kudliwe ekuseni. Bona babesithi yisilayilo, kwakwejayelekile ukuthi kudliwe inkobe kumbe ukudla okusele ntambama okuthiwa ngamalaja.
Kodwa ngokuqhubeka kweminyaka basebesidla ilambazi elalande ukudliwa ngabantu abagulayo (umphungo).
Lamuhla ngizakhuluma ngokupheka amalambazi ehlukeneyo langendlela zokuwapheka ezehlukeneyo.
1. Ilambazi lempuphu yomumbu
Okudingakalayo
– impuphu yomumbu elingana imuli yakho.
– Isawudo, itshukela ngokuthanda kwakho.
– Uchago, imajarina, idobi, lelemoni ngokuthanda kwakho njalo.
– Imbiza lophini.
Ukupheka
– Bilisa amanzi ngembiza.
– Thatha impuphu yomumbu elingeneyo uyihlanganise lamanzi aqandayo ibeyinhlama.
– Thela inhlama le emanzini abilayo ugoqoze.
– Thela isawudo, itshukela, ilemoni lemajarini.
– Yekela kuxhwathe, ujinge ugoqoza.
– Yekela kuxhwathe eziko okwemizuzu engu20 emlilweni omncinyane.
2. Ilambazi lempuphu yophoko
Okudingakalayo.
– qoqa konke ngokufanayo lokwelambazi lakuqala.
Ukupheka
– pheka njengelambazi lakuqala udle njengalokhu.
3. Ilambazi lempuphu yamabele.
Okudingakalyo
Konke okukulambazi lakuqala upheke njalo njenge lambazi lakuqala.
Ukudliwa
Dlana ilambazi lisatshisa njengakuqala.
4. Ilambazi elimunyu lempuphu zonke
Okudingakalayo
– impuphu loba ngeyani elingana imuli yakho.
– Aamnzi atshisayo okwenza inhlama.
– Gcina inhlama le esikalini okwensuku ezimbili endaweni efudumalayo ukuze ibile ikhudumale ibemunyu.
– Itshukela lemajarina.
Ukupheka
– qala ngokubilisa amanzi.
– Khathesi goqozela inhlama emunyu emanzini atshisayo.
– Goqoza kuze kuxhwathe.
– Yekela emlilweni omncinyane kuxhwathee okwemizuzu engu20.
– Faka imajarina letshukela ngesilinganiso sakho.
Nanzelela lokhu: Abanye bathanda ukuzifakela itshukela emiganwini yabo nxa sebe sidla.
Dlana lisatshisa lelilambazi limnandi.
Ukudliwa
Phakulula kudliwe kusatshisa, ofaka idobi loba uchago afake ngokuthanda kwakhe.
