uMthunywa
MAVIKI onke elikazulu likhetha ukukujabulisa wena mlandeli walo ngokukulethela abantu abatshiyeneyo bechazela uzulu ngamathalenta abo atshiyeneyo, kule iviki uMthunywa ukudibanisa lejaha lakoNtuthu elitshaya isiginci kunqekuze lezalukazi. Lelijaha liphuma elokitshini leNew Magwegwe njalo alitshayi siginci sodwa liphinda libe ngumfundisi.
Balandeli bakaMthunywa nxa lifuna ukwazi kabanzi ngomhlabeleli lo nansi ingxoxo phakathi kwentatheli yephephandaba uArnold Ndlovu (AN) lomculi uThamsanqa Khumalo (TK).
AN: Khuya jaha elidala akusithi fahla ngamafitshane ngembali yezomculo wakho lokuthi wagqugquzelwa yini uze ukhethe ukucula iAfro Jazz.
TK: Mina ngokuzalwa nginguThamsanqa Khumalo kodwa emculweni ngisebenzisa elithi Thamie Khumalo umfana waseNew Magwegwe. Ukucula okokuqala ngingathi yisiphiwo engasiphiwa nguMdali, ekukhuleni kwami phakathi kwemuli ethanda umculo kwadlala indimi enkulu ekungigqugquzeleni ukuthi ngigxile kakhulu emculweni.
Ngikhula ubaba ubelesiginci ayehlala esitshaya zikhathi zonke ngakho ngisakhula lami ngangifisa ukutshaya isiginci njengaye. Udadewethu uVuyelwa ocula ezokholo laye ulesandla ekuculeni engikwenzayo.
AN: Hawu, ukucula lokhu kukhanya kusemulini, njengomculi uvame ukuculela ngaphi?
TK: Yebo, ukucula yinto esayiphiwayo ngekhaya. Mina njengomculi ohlala koNtuthu yiyo indawo engivame ukuculela khona, ezikhathini ezinengi ngicula emitshadweni, emikhosini yamankampani, esontweni, kuma-concerts lama one-on-one ngiyawenza nxa ungangicela.
AN: Lokhu waqalisa ukucula sowakhipha amadlalade amangaki njalo alemfundiso bani kuzulu?
TK: Lokhu ngaqalisa ukucula professionally ngo2016 sengakhipha idlalade elilodwa, khathesi ngikhangelele ukukhipha i-single ezabizwa ngokuthi “umuzi wakhiwa ngothando” ngibe sengikhipha idlalade lami lesibili kunyanga ezayo.
Njengomuntu ongumfundisi umculo wami ngithanda ukuthi ubelemfundiso yothando, ukuxolelana, ukujabula lokutshumayeza ilizwi.
AN: Abantu bawamukela njani umculo wakho njalo ukhangeleleni emculweni wakho Dlangamandla?
TK: Abantu bayawujabulela kakhulu umsebenzi wami njalo bangikhuthaza ukuthi ngiqhubekele phambili ngawo ngingadeli. Okunye engingakuthembisa abantu yikuthi ngizasebenza nzima ngicine sengifinyelele eAfrica kumbe emhlabeni wonke jikelele ngomculo wami.
Ngalokhu uzulu ngimthembisa ukuqhubekela phambili ngimjabulisa ngengoma zami ngimenzele lama-shows endaweni ezehlukeneyo.
AN: Bunzima bani oyake uhlangane labo kwezomculo njalo nkuthazo bani oyipha abaculi abasasungula?
TK: Ubunzima engiyake ngihlangane labo yindaba yokuthola umculo ozaba ngowami, ukuhlanganisa umculo ukuze uphume usujulile kanye lokubhala ingoma ezathinta abantu.
Ngokunjalo kubaculi abasasungula ngithi kabaqhubekele phambili besebenza nzima, bengadeli ukubhala izingoma ngoba ngelinye ilanga kuzabalungela.
AN: Sikhangela kuHulumende kuyini ongathi bengayenzela abahlabeleli ekuthuthukiseni umculo elizweni lakithi?
TK: Okokuqala siyabonga ukuthi sebesivulele imisakazo ezindaweni ezitshiyeneyo zelizwe, koNtuthu khathesi sokulemisakazo emibili okuyinto enhle kubahlabeleli. Engingacela basiphathise ngakho yikuvikela umculo wethu ekuthengisweni ngokungekho emthethweni.
