uMthunywa
Cornelius Luphahla
NGEZIMNANDI kuphela lonyaka abaculi bakuleli abajonge ukuzethulela uzulu kusukisela ekuqaliseni komnyaka uze uyekuthi goqo nanko phela bonke bathembisa ukuhwatsha amadlalade kanye lamaDVD amatsha.
Abaculi laba abathembisa ezimnandi bagoqela abe-rumba, maskandi, house, kwasa kanye labanye njalo abacula imculo etshiyeneyo kuleli.
UMthunywa ukhulumisane loAllen Ndoda umculi we-rumba wathi uthembisa ukuhwatshela uzulu elinye njalo idlalade elitsha kanye lokumvakatshela endaweni ezehlukeneyo.
“Mina ngithembisa ukuhwatshela abalandeli bami bakuleli umtshoko wedlalade otshisa bhe ukuze bahlale bejabulile. Kusenjalo ngizabavakatshela endaweni ezehlukeneyo ngibadlalela ingoma zami ngibuye ngibazwise idlalade lami engilikhiphe ngomnyaka ophelileyo.
“Labo abafisa ukuthi ngibenzele ama-shows kabakhululeke ngoba ngilapha ngenxa yabo ngakho kangisoze ngabadanisa,” kutsho uNdoda.
Ekhuluma lentatheli uZinjaziyamluma ongumculi kamaskandi uthe lonyaka uthembisa uzulu ividiyo yomhlaba kanye lokuqhubekela phambili evakatshela umphakathi edlala ingoma zakhe.
“Lonyaka ngikhangelele ukuqhubekela phambili ngohlelo lwami lokuvakatshela abalandeli bami endaweni ezehlukeneyo njalo ngizahwatsha ividiyo evutha amalangabi. Uzulu kalindele okukhulu ngoba lukhulu luyeza kwezomculo,” kutsho uZinjaziyamluma.
Umculi we-house-kwasa uZee Wengoma uthe lonyaka ufuna ukuqhekeza uBulawayo ngengoma zakhe ngoba uzakwenza ama-shows amanengi kakhulu abuye ahwatshe idlalade elitsha.
“Lonyaka ngithembisa abalandeli bami ukuthi ngisazobenzela ama-shows amanengi kakhulu koNtuthu ukuze labo abangangaziyo bangibone ngamehlo. Ngizahwatsha njalo elinye futhi idlalade lomhlaba lonyaka ngilisakazele uzulu ukuze ahlale esenjabulweni.
“Labo abafisa ukuphatheka emculweni we-house-kwasa bakhululekile ukuthi bakhulumisane lami sincedisane kwezomculo ukuze siwuthuthukise kuleli,” kuphetha uZee Wengoma.
