uMthunywa
Cornelius Luphahla
BEKUSINDWE ngobethole kuguga othandayo emkhosini wesikhumbuzo senkosi uMzilikazi lapho amaqembu kamaskandi angene kwaduma uladuma.
Umkhosi lo ubuseMhlahlandlela eMatobo ngoMgqibelo kuviki ephelileyo ngenhloso yokukhumbula inkosi uMzilikazi kanye lokuthuthukisa ezamasiko kuleli.
Emkhosini lo bekulamaqembu kamaskandi agoqela uMaz’velela Khabo, Insukamini, Amabhukudwane, uMehlokazulu kanye lamanye njalo amaqembu ezamasiko atshiyeneyo.
UMthunywa ukhulumisane loMaz’velela Khabo omunye wabaculi bakamaskandi abebekhona emkhosini lo wathi uzoqhubekela phambili ejabulisa uzulu njalo uyabonga usekelo kuzulu.
“Mina ngibonga uzulu ngokuphatheka emkhosini lo ukuzojabula lathi. Ngalokhu sizaqhubekela phambili sijabulisa uzulu ngezokujabulisa uzulu endaweni ezehlukeneyo. Ngalokhu ngilethemba lokuthi uzulu uzaqhubekela phambili ngokusekela umculo lo,” kutsho uMazvelela.
Induna uNhlanhlayamangwe Ndiweni ithe iyajabula kakhulu ngomsebenzi oyenziwe ngamaqembu kamaskandi yabuya yagqugquzela ukuthi aqhubekele phambili.
“Ngiyajabula kakhulu ngomsebenzi oyenzwe ngamaqembu kamaskandi emkhosini lo. Ngalokhu ngiwakhuthaza ukuthi aqhubekele phambili ngomsebenzi wabo lo ngoba uthuthukisa amasiko.
“Ngitsho lokhu ngesizatho sokuthi umculo kamaskandi uvele uyingxenye yezamasiko ngoba imvunulo yawo kanye lendlela ogidwa ngayo kuveza amasiko akwethu. Ngalokhu ngikhuthaza uzulu ukuthi awuphakamise umculo lo amaqembu awo amemetheke ukuze amasiko ethu avuseleleke,” kuphetha induna uNdiweni.
