Uyaxolisa uRaza

13 Jul, 2023 - 00:07 0 Views
Uyaxolisa uRaza Raza

uMthunywa

Brandon Moyo

KUVIKI edluleyo, iZimbabwe iphume kumqhudelwano we 2023 World Cup Qualifiers ngendlela ebuhlungu ngemva kokunqotshwa yiScotland kumdlalo owenzeka eQueens Sports Club koBulawayo.

Iqembu lamaChevrons bekumele linqobe lumdlalo ukuze liqhubekele phambili liyedlala kuWorld Cup e-India ngoMfumfu kodwa lehluleka ukunqoba abafana beScotland.

Omunye wabadlali abaphambili kuqembu leZimbabwe, uSikandar Raza uxolisile ngokwehluleka kwabo ukufinyelela kuWorld Cup.
Ekhuluma kunkundla zokuxhumana (Twitter), uRaza uxolise abalandeli bekhilikithi elizweni kodwa wathi isibanga abasifikileyo njengeqembu siyamthokozisa.

“Sidabukile, silimele, sephukile, sisezinhlungwini njalo manengi amagama achaza lokhu esikuzwayo njengamaChevrons ngalesi isikhathi.
Siyaxolisa ukuthi asenelisanga ukuqeda umsebenzi lokufeza amaphupho kodwa ngiyacabanga kulungile kunjalo ukuzwa yonke limizwa.

“Kodwa ngiyaziqhenya kakhulu ngaleliqembu, ngebanga esilihambileyo lonyaka. Ngiyaziqhenya ngokuzimisela esikwenzileyo njalo ngiyaziqhenya ngendlela emangalisayo ngabalandeli bethu ngokusenza sikholwe njalo langothando lenhlonipho abasitshengise yona.

Ngiyaziqhenya njalo ngohambo esesilwenzile njengenhlanganiso,” kutsho uRaza kunkundla yokuxhumana yeTwitter.
URaza, oleminyaka engu-37 yokuzalwa ubeyingxenye ebalulekileyo kuqembu lamaChevrons, esenza umsebenzi obukekayo kulo mqhudelwano ophelileyo. URaza ubengomunye wabadlali abaqanjwe kubadlali abangu-11 abadlale ngobunono obukhulu kumqhudelwano ophelileyo.

URaza uqede elama runs angu-325 ngemva kwemidlalo eyisithupha ele average ye-65 kumdlalo owodwa. Elebhola esandleni, uRaza uthethe amawikhethi ayisitshiyagalolunye, elamanani ancomekayo athi 4/55 kumdlalo owodwa.

Share This:

Sponsored Links

Survey


We value your opinion! Take a moment to complete our survey

This will close in 20 seconds