uMthunywa
UMQEQETSHI we-Acornbush United, uMacDonald Makhubedu, usexolisile kuKaizer Chiefs kanye lomqeqetshi wayo, uSteve Komphela, kulandela ukuphawula kwakhe akwenza ngemuva komdlalo.
UMakhubedu wathi usele ephoxekile ngenxa yezinga eliphansi leChiefs emdlalweni weNedbank Cup ngesikhathi elengxoxo eyayidlalwa esiteshini sikamabonakude.
“Wonke umuntu uzele ukuzobona iqembu elikhulu ezweni base babuka lento,” kutsho uMakhubedu. “Kahleni bakwethu, abafana bami abafundanga lutho lamhlanje.
“Bengifuna bafunde, akuthelanga zithelo kumi njengomqeqetshi futhi bengifuna ukusebenzisa lumdlalo ukuzilungiselela ama-play-off.
“Uma ngabe leli bekuliqembu elikhulu kulawo wonke ezweni, iqembu lesizwe alisoze latshaya iLesotho ngoba nxa laba kungabadlali abakhulu sisenkingeni enkulu,” kutsho uMakhubedu.
Lokhu akwehlanga kahle kuKomphela njengoba laye eye wajikijela ngamazwi kulumqeqetshi, waphinde wanxusa iPSL ukuthi imjezise kanzima.
“Ngicabanga ukuthi iPSL kumele ithathe izinyathelo. Abanye bethu abaqeqetshi bakhuluma udoti.
“Kumele ajeziswe ngalokhu akutshoyo. Laba abafowethu kumele babekwe amacala,” kutsho uKomphela
Manje uMakhubedu usexolisile kuChiefs kanye labasebenzi bayo ngamagama awasebenzisileyo ngemuva kokuthi iqembu lakhe litshaywe yilezi izinkunzi zaseSoweto ngo-2-1 emdlalweni weNedbank Cup.
“Ngiyaxolisa kakhulu,” kutsho lumqeqetshi.
“Ngifuna ukuxolisa kuSihlalo weKaizer Chiefs, uKaizer Motaung, uBobby Motaung, iwofisi leKaizer Chiefs, uSteve Komphela, ithimba lakhe labaqeqeshi kanye labadlali.
“Ngifuna ukuthi ngiyaxolisa futhi kuSteve, abadlali labaphathi. Ngifuna lokuxolisa kuPSL, iSafa kanye labezindaba. USteve usengumuntu ophezulu kulami.” — Ubulembu