uMthunywa
YiNtatheli kaMthunywa
IZIKOLO ezidlala umdlalo wokubhaqa (Rugby) koBulawayo zikhangelelwe ukuthi zibophe ziqine mhla zidibana lentshantshu eziphuma kwezinye izabelo kumqhudelwano omkhulu womnyaka kulimpelaviki.
Umkhosi lo wawudume ngelithi yiPower Sales Festival yiwo ovula imincintiswano yonke kumdlalo wokubhaqa kubanga lezikolo njalo uqhutshwa minyaka yonke enkundleni yeHartsfield koBulawayo. Omunye umncintiswano waphezulu ohlanganisa izikolo ngoweDairiboard.
Kumbiko othunyelwe iphephandaba likazulu, abaqoqi bemidlalo le babika ukuba amagedi enkundla kubikwa azavulelwa kuzulu mahala kusukela mhlaka 7 kuze kuyefika umdlalo we-final mhlaka 8.
Inhlanganiso yeMatabeleland Rugby Football Boards isiqoqe imidlalo le isebenzelana ndawonye lengatsha zemidlalo ezikolo okweminyaka eyedlula itshumi. Izikolo eziphuma koBulawayo ezijwayele ukukhankasela inkezo le zibalisa iNtumbane, iGifford, iMilton, iHlathi,CBC lePetra lezinye ezemalokitshini ezisabumba udumo kwezokubhaqa.
IPlumtree High layo ingezinye zezikolo ezaphenduka kulumncintiswano zizovuselela umbuso kulumdlalo.
Intshantshu ezesatshwayo ezilakho ukuhamba lenkezo yi Falcon, Watershed, Allan Wilson lePrince Edward.
Isikhulumi semidlalo, ophinda abengumqondisi, uThemba Phiri ubike ukuba banxuse njalo lezikolo ezithile ezeBotswana. Uthe isikolo sinye ngasinye sizadlalisa amaqembu amathathu.
“Umncintiswano wethu wezikolo usukhona njalo uzaqhusthwa kunkundla efanayo eyeHartsfield mhlaka 7 kusiya kumhlaka 8 kulinyanga. Izikolo ezivela kuzo zonke indawo zelizwe ziyadibana kubangwa yona inkezo yePower Sales.
Sikhangelele amaqembu angamatshumi amabili lanhlanu. Kulezinye izikolo zeBotswana ezithembise ukuba zizancintisa, okuyikho okuveza ukuthi umncintiswano lo uyaphambili.
“Inhloso yethu ngeyokukhulisa umdlalo wokubhaqa ikakhulu ezikolo. Siqoqa imidlalo le sikhuthaza umphakathi ukuthi sigoqwa sisemanzi. Izikolo eziphatheka kulumkhosi zisebenzisa imidlalo le ukulungiselela eminye imincintiswano yaphetsheya,” kubika uPhiri.
