uMthunywa
Nkosilathi Sibanda
UMQEQETSHI weFC Platinum uNorman Mapeza kuzamele abelalo iqhinga lokuvala zonke inhlelo zeqembu leHoroya AC mhla zombili zidibana kusigaba sesibili somdlalo ongaphansi kweCaf Champions League ngoLwesibili.
UMapeza waphenduka isithutha, waswela amaqhinga ngempelaviki iqembu litshaywa ekhaya lalo nge 1-0 enkundleni yeBarbourfields.
Ukhona umdlali ozagijimisa imvimbi zePlatinum kuze kuyephela umdlalo, uOcean Mandela, ongumgadli weHoroya.
Umdlali lo nguye owanikeza uMapeza usuku angasoke walukhohlwa kulumqhudelwano.
Ukuze anqobe kumdlalo ozayo, umqeqetshi lo ulomlandu wokuthi alungisise iqula lemvimbi ezikhaliphileyo, ezizenelisa ukuthi zivale indlela okuphunyuka khona abagadli abalesiqubu njengoMandela.
Umdlali lo, labanye bakhe sebekubeke emphakathini ukuthi ngoLwesibili bakhangelele ukuphutsha isigaba samaqoqo bekunombolo ephezulu.
UMandela, ekhuluma ku-website yaleliqembu uthe ukunqoba iFC Platinum kubanikeze ukuzethemba.
“Ukuzethemba esesilakho ngemva kokunqoba kuFC Platinum kuzenza ukuthi sinqobe kumidlalo elandelayo.
Sizawancindezela wonke amaqembu alandelayo. Kumdlalo wethu osekhaya sileFC Platinum kufanele ukuthi umdlali asebenzise wonke amandla alawo ngoba yikho esizavukela khona,” kubika lumdlali.
UMandela waqeda umdlalo ejabulise lababukeli abasekela iFC Platinum ngenxa yokuthi waba ngomunye wabadlali abatshibilika ngendlela eyahlasimulisa lo owazi ubuhle bukanobhutshuzwayo.
Umdlali lo oleminyaka engu-29 yokuzalwa, waqala ukudlalela isizwe seBurkina Faso ngesizini ka2010.
Ebuzwa ngendlela abhuqwe ngayo ngabadlali beHoroya, uMapeza uthe okwakhe labadlali yikuthi bathole ithuba lokufunda njengoba bechinsa lesi isigaba somdlalo.
“Okwethu yikuthola ulwazi, sifunde. Siyaqalisa ukudlala kulesi isigaba seChampions League. Kumele sisebenze gadalala kumidlalo yethu eseleyo.
IFC Platinum aziyihambeli kuhle izinto njengoba isidlale imidlalo emihlanu kulumncintiswano kodwa isehluleka ukuhlohla. Ayikatholi ngitsho lomklomelo.
Isifo esiphethe leliqembu ngesokudlala lihlose ukuvala igedi.
Okwamanje abammeli beZimbabwe laba bahlezi kunombolo yokucina kulogu, okutsho ukuba umqanso uzaqonga kumqeqetshi kumidlalo ezayo.
