uMthunywa
Lovemore Dube
OBEQOQE imidlalo yeWhite City Stars Athletics Club Track and Field Championhips usuthisekile ngempumela yemidlalo yakuqala.
Beze bevela kumacele onke eZimbabwe ukuzogijima eWhite City kumdlalo osungule umnyaka omutsha wabagijima bajike enkundleni okuthiwa yi-track.
UManuel Mpofu onguye umninkazi njalo lomqeqetshi waleliqembu ubike ukuthi bekungumdlalo wokuqala womnyaka. Uthe lonyaka kuzaba lesiphithiphithi njengoba kulemidlalo emithathu emikhulu eqoqiwe zinhlanganiso zemidlalo.
Ilizwe leFrance lizamukela izethekeli labadlali abanengi abazabe belande iParis Olympics kuNtulikazi ka2024. Imidlalo le yiyo ezenza abanengi abakuleleli lomhlaba wonke jikelele badonse ziqine kumalungiselelo kusase kufasiteli labangenelisa ukuya gijima lapho lisavuliwe.
“Lo Isaac Mpofu ubekhona. Ugijime i10000m, utshengise ukuthi inhloso yakhe ngamaOlympics,” kutsho uMpofu eseWhite City.
Uncome amaqembu labagijimi abatshengisele ukuzimisela.
“Ngithakazelele inani labagijimayo elibuyileyo. Isiqalile imidlalo yokugijima. Konke kuhambe kuhle, akuselakhefu kumidlalo le,” kutsho uMpofu.
Akade begijima umnyaka wonke ngabagijima imango emide kumbe ingxenye yayo lamanye amabanga atshiyeneyo.
UMpofu uthe lokhu kupha abagijimayo, abeqayo labajikayo ithuba lokuthi bazilolonge ma imidlalo etshisayo kungenwa kuyo bazizwe sebekumelele.
UZibusiso Nyoni oweKip Keino Athletics Club emangweni weGwanda ugcizelele wathi kuyathokozisa nxa abagijimayo besukuma ngobunengi bevelele kuzigaba zonke. Uthe lokhu kuthuthukisa imidlalo yokugijima.
“Kuhle nxa abantu besiza ngobunengi ekuqaleni komnyaka wokugijima. Lusalude uhambo,” kutsho uNyoni.
Ukhona owesifazane otshengisele ukuthi angaba yitshantshu engendlalelwa kuhle kuhambo lwakhe uThembelihle Ncube weLobengula High School.
Ugijime kakuhle ethatha inombolo yesibili ku100 and 200m wagcizelela ngokuba ngowokuqala ku4x100m eyokuqhutshelwana isigodo.
Umncane langomzimba okaNcube oleminyaka elitshumi lane kodwa indlela aqeda ngayo egijima lesigodo sokugqiba lowomncintisano wabodade, kutshiye abantu bemangele.
