uMthunywa
Lovemore Dube
ABANTWANA abahlala emaphandleni abalethalenta kwezemidlalo sebekhuthazwe ukuthi bengakhathali ngoba yikho lapho abangathola khona impilakahle.
Inkuthazo le ivele kuStella Ndebele-Shimell, oyisizalwane sakuleli, owafunda esikolo seMvundlana Primary School esigabeni seTsholotsho, osehlala njalo esebenza eNgilandi.
UNdebele-Shimell, odume ngelithi “uMaNdebele” ukhulume lokhu ngesikhathi evakatshele esikolo lesi lapho akade elande ukuyanikeza impahla ezasetshenziswa ngamaqembu enguqu.
Ufunde eMvundlana Primary School wadlulela eTsholotsho High School ngeminyaka yama1980s, ilizwe lisajabulela uzibuse.
Usuke kuleli esiya eMzansi ngo1993, wasedlulela kweleNgilandi lapho asehlale khona kusukela ngomnyaka ka-1998.
UMaNdebele uthe usafunda eMvundlana, ukhule engumuntu obengelandaba lezemidlalo kodwa ngemva kokukhuthazwa yizakhamizi ubelengqobe yokuthi abeyingxenye yokuletha inguquko kubafundi abalesiphiwo sokudlala inguqu esigabeni seTsholotsho.
Uhlala edolobheni leReading, okuyindawo ebudebuduzane ledolobho leLondon. Uthe ekuqoqeni impahla ayinikeze isikolo seMvundlana, ubesebenza loThamsanqa Ndlovu oweMajinkila Hope Foundation.
“Ngaxhumana loThamnsanqa Ndlovu oweMajinkila Hope Foundation, sasebenza sonke ekuqoqeni impahla lezi,” kutsho uMaNdebele engakayinikeza njalo leqembu leMakhosi labafana bakaCharles Hadebe lezinye izikolo.
UMaNdebele wethekelele kuleli elomkakhe uJohn Davey omangaziswe yibuhle bedolobho lakoBulawayo lendawo ezinengi ezikumhlubulo weMatabeleland.
Kulandela ukwelula isandla okwenziwe nguMaNdebele, uSobhuku wesiqinti seMvundlana uLethu Moyo uncome uNdebele-Shimell ngokungakhohlwa lapho avela khona.
UMoyo uncome wathi imisebenzi le izaphathisa intsha ukuthi ikhuthalele kwezemidlalo.
“UMaNdebele ngumzawami njalo ngilokuthaba ngesenzo sakhe sokuphakamisa indawo akhulela kuyo. Kakhohlwanga la avela khona. Wathola ithuba lokuthi ayefinyelela khona emazweni, ngokuphenduka kwakhe kazange akhohlwe ekhaya. Wakhumbula khona esikolo athola khona imfundo. Kube ngumbono omuhle ukuthi asikhumbule,” kutsho uMoyo.
UMoyo uthe imizamo enjengale iyaphathisa ukususa intsha kuzidakamizwa, zona esezilahlise inengi labasakhulayo.
Uqonqosele wathi abanye abasemazweni bakhumbule ekhaya ukuze babeyingxenye yokuphakamisa indawo abakhulela kuzo.
“Kubo bonke abasemazweni aphetsheya ngithanda ukubeka amazwi ahlakaniphileyo. Ngithi kabakhumbule ekhaya. Ngicela ukuthi libathumele ama-kit. Lapho elikhona ngithi dobhani amakepesi likhumbule ekhaya.”
