uMthunywa
Ncekwenhle Ncube
AKUSELA isizatho sokukhalaza ngamabhola okudlala kumaqembu amancinyane enkambeni yeqembu leHighlanders nanko phela sekulamabhola amatsha avela emazweni.
IBosso ihlekelela esikhewini ngokuthola amabhola athunyelwe ngabalandeli bayo abasebenza eNgilandi. Osabambe isikhundla sikamgcinisihlalo weHighlanders uMorden Ngwenya sedlulise isibongo esikhulu kumaxuku (chapters) abalandeli asendaweni ezehlukeneyo ngokuphathisa iqembu ukuze liqhubekele phambili lisenza okuhle.
Lokhu kuza kulandela ukuthi abalandeli beqembu leBosso abahlala elizweni leUK abazibiza ngokuthi yiUK Bosso Supporters Chapter bethengele iqembu labo amabhola angu-20 kuviki edluleyo.
Amabhola lawa aphiwe iqembu lamahlolanyama ngokusemthethweni ngeNsonto kuviki edluleyo ngekhefu lokunatha amanzi ngesikhathi iHighlanders idlala labafana beBulawayo City.
Umsekeli kamgcinisihlalo we-chapter le uSisa Mkandla ongumhlabeleli njalo, ubikele intatheli kaMthunywa ukuthi njengequla bajonge ukuphathisa iqembu ngokuncane abalakho ukuze abafana beqhubekele phambili bejabulisa umphakathi.
“Thina njengabalandeli beqembu leBosso abaseUK sikubone kungumlandu wethu ukuthi sincedise iqembu ngalokhu okuncane esikwenelisayo okwamanje. Silethemba ngokuya kwesikhathi sizenelisa ukuthi siphe okuthe xaxa.
“Sinanzelele ukuthi iqembu lethu libhekane lobunzima bokulwisana lezikwelede kuyikho sithi lathi sincedise ekuphunguleni umthwalo ngalokhu esikwenelisayo.
“Sinxusa njalo labo abasemazweni abangabalandeli beqembu ukuthi baziphe umthwalo wokuthi bancedise iqembu ngokuhlanganyela labanye nxa kuphiwa izipho zeqembu,” kutsho uMkandla
Iqembu liphiwe amabhola angu-20 okuvele okuthi angu-10 ngawokulolonga iqembu kuthi amanye angu-10 ngawokudlala emidlalweni emikhulu.
Omele umgcinisihlalo weqembu leHighlanders uMorden Ngwenya udlulise isibongo esikhulu ngesiphiwo abasinikezwe ngabalandeli beqembu abaseUK.
“I-UK Chapter ayikhulumi ngomlomo kodwa ngezenzo. Basibuza ukuthi sifunani sathi amabhola sebesiphile. Ngimele iqembu sithanda ukubonga kubalandeli laba sisithi bengapheli amandla.
“Kunengi abakuthembisileyo njalo esikwaziyo ukuthi bazakufeza. Sifisa ukuthi abanye abalandeli bafunde lapha bengezi kuphela ngokusola kodwa bencedise ukukhulisa iqembu,” kutsho uNgwenya.
Ubuye njalo wabonga wonke amanye ama-chapters asendaweni ezitshiyeneyo agoqela iVic Falls abaphathisa iqembu ngokubhadala indleko ngesikhathi belolonga ngekhefu labaseSouth Africa ngokufanayo.
Ubuye njalo wathi ngeke babiselwe emuva ngabalandeli abangafuni ukuncedisa iqembu kodwa belinde ukusola.
“Iqembu leli lidala njalo ngelezwe lonke ngakho ngeke sibiselwe emuva ngabalandeli abangakwazi ukubuka okuhle.
Asithandi abantu abangafuni ukuletha impucuko kodwa belinde ukusola okungenziwanga kuhle,” kutsho uNgwenya.
