uMthunywa
YiNtatheli kaMthunywa
LO owanqoba kumjaho wePPC Matopos 33-Miler kumele abonge uMdali ngoba waphosa wakhutha ugatsha lokuthola umvuzo we$1 000 kulandela ukulahleka kwakhe egangeni leMatopo ngempelaviki.
ULyno Muchena wayengomunye wamadoda alahleka angena iganga leMatopo National Park, ephambuka indlela okomango owedlula amakhilomitha ayisithupha kulumncintiswano.
Abagijimi laba abangamatshumi amabili lanhlanu bebekhokhela kulumjaho kodwa baqhubeka begijima bengazi ukuthi baqonde indlela engayisiyo. Ukulahleka kwamadoda la kudalwe yikuthi imota ebibakhokhela eyenkampani yePPC isuke yadonsa kumgwaqo oya empumalanga kwephakhi yenyamazana eMatopo, endaweni yokuthi ijike ingene komunye umgwaqo.
Iqula labagijimi laba likhokhele umjaho njalo kwaze kwanqoba uMuchena.
Ukulahleka kwabagijimi lokhu kuphazamise ukuqhutshwa kuhle komjaho, kwatshintsha lezikhathi zokutshaya intambo.
Isikhathi sokuqeda umjaho lo sibalulekile kumjaho wokugijima ngoba sisetshenziswa kweminye imijaho.
Iphephandaba likazulu lizibonele mathupha isehlakalo lesi esisuke sangcolisa umjaho lo obatshazwa kakhulu kukhalenda yezokugijima kuleli.
Kulandela ukulahleka kwabagijimi laba, umtshayeli wemota ebikhokhela ubalayitshe waze wabehlisela phambili, okuyinto engavunyelwayo kumdlalo wokugijima.
Ukuthwala ngemota lokhu kucunule inengi elikhethe ukukhalala umjaho. Abagijimi abayisitshiya galolunye baqede umjaho bezihambela.
Ebuzwa ngesehlakalo lesi umgcinisihlalo weBulawayo Athletics Board uManuel Mpofu uthe okwenzakalayo kuyadanisa.
“Kuyadanisa sibili ngoba besingakukhangelelanga. Ukuthwala kwabanye ngemota kudale ukuthi abagijimi abangu-9 bakhalale.
“Inhlanganiso yeBulawayo Athletics Board ilusizi ngalokhu okwenzakeleyo. Sithanda ukuxolisa ngalokhu,” kutsho uMpofu ekhuluma loMthunywa ngemva komjaho.
Kusenjalo umaqhuzu wePPC Zimbabwe uKelibone Masiyane uxolise kakhulu ngesehlakalo somjaho.
