uMthunywa
Charles Dube
Kuviki ephelileyo sitshiye uMbengo Ncube, ilihlo lenduna eHadlana, esuka ngesiphangephange etshwaleni koWozola ngoba insikizi enguMaliwa yamphikelela, waze wabona ukuthi kungcono asuke azihambele kusekuhle.
UMaliwa watshengisa indelelo enkulu kuMbengo ethi kwakuthiwa kwenziwani kuhanjiswa abantwana esikolo.
Khumbula ukuthi lapha kwakuyisikhathi imfundo iqalisa ukufika kuleli abantu bengakayiboni ukuqakatheka kwayo.
Owayesisa umntwana esikolo kwakuthiwa udlalisa imali. UMaliwa uphoxa uMbengo nje ngoba udlile amabele.
Udakiwe ukhuluma izinto okungamelanga azikhulume phakathi komphakathi.
Ngumuntukazana uMaliwa lo odelela ilihlo lenduna okwenza uMbengo laye avume ukuthi bayabenza abantwana, etsho ukuthi abantwana benza ihlazo baze bakhonkothwe yizinja. Izinja ezitshiwo nguMbengo ngabantu abangelancedo njengaboMaliwa.
UMbengo esecatshulwe yikwenza kukaMaliwa wathintitha amaphethu wavalelisa umnakwabo uWozola, wahamba.
Esehambile uMbengo, umuntu ohloniphekayo, basala bemkhakhatha abantu uMaliwa ngesenzo sakhe esibi kangako.
Babezwiwa ngubani ngoba ngenxa yokudakwa ngesikhatshana bamuzwa esehoqa.
Yayiziphilela kanjalo iHadlana, engasananzwa loMbengo. Kunkulumo elandelayo umlobi usinika isifundo esiqakathekileyo ngoPhezulu, uMdali.
Umlobi uthi, “Ngabe oPhezulu wathi ukudubeka koyedwa kudube bonke abantu balowomango, ngabe umhlaba mubi.
Lokunyeya ngabe akukho. Pho aphile njani umuntu enganyeywa?” Ngamanye amazwi lokhu kutsho ukuthi ukudubeka kumele kubekhona empilweni zabantu.
Lokunyeya kukhaya kuyadingeka empilweni yomuntu yikho umlobi ebuza ukuthi pho aphile njani umuntu enganyeywa. Ukunyeywa kutshengisa ukuthi uyaphila lowo onyeywayo. Kungaze kwakuzondisa ukunyeya, kodwa kuthathe njengengxenye yempilo.
Kuthiwa wakwenza ngabomu oPhezulu ukuthi abanye babemhlotshana ukuze bahlekwe, abanye besabeke ukuze banyeywe, kodwa baphile bonke, ngoba lolendlu eyedlulwa ngekathekwaane uyaphila. Longawafakiyo amanzi emzimbeni uyaphila, lolala ekhwezela izikhuni uyaphila. Siyatshelwa ukuthi impilo yedlula isidumbu.
Isidumbu esicwazimulayo siya emhlabathini munye lesidumbu esilamaxolo, zombili zivundise umhlabathi.
Okusobala lapha yikuthi phambi kuNkulunkulu, uSomandla abantu bonke bayafanana kungelakuthi omunye uyazuza kumbe omunye uyaswela. Yikho nje ngabona enye imbongi ithi ekufeni siyalingana.
Zonke izidumbu zingena phansi emhlabathini. Siyabona ukuthi kusadliwa ngoludala omama labo babeqakathekiswa.
Sibona uMbengo efika ngekhaya elandisela owakwakhe uMaNgwenya ngakwenziwe nguMaliwa. UMaNgwenya wabuza kuMbengo ukuba bamyekela yini uMaliwa eyangisa uMbengo.
Wakhangela phansi uMaNgwenya kodwa ngaphakathi esithi uMaliwa usejayele. Wayeke wezwakala ngolunye usuku, etshwaleni ebahleka abako abakoMbengo.
Wayeke wezwakala futhi esithi bayamhlolela uNgezile, esithi umntanabo uSilobile nxa elungile wehluleke njani ukumehlula uNgenzile. Wakhala uMaNgwenya wathi nxa uMaliwa engatshelwanga ukuthi akasinkunzi yeHadlana uzakuze akhulume kubi.
Wafisa ukuthi aluba nguye ovunula amabhetshu ngabe sewake wamgijimisa ngenduku uMaliwa wabo lowo.
Wangathi uyamuzwa uMbengo, ngakho wathi, “Aluba bengithanda ngabe ngimmahlaze ikhanda ngembokodo.”
Kodwa watshengisa ubuntu uMbengo ngoba kakwenzanga lokho, wazibamba njengomuntu omdala ohloniphekayo.
Zwana okwalandela lapha kuviki ezayo.
