uMthunywa
YiNtatheli kaMthunywa
Amapholisa eChisumbanje aphenya udaba lapho okubikwa kulabantu abangazakaliyo abagebha ingcwaba batshontsha isidumbu sosane olulomnyaka owodwa wokuzalwa olwabhubha kuNhlolanja lonyaka.
Linkiyankiya yenzakale esiqintini seMusaonyerwa ngoMgqibelo lapho izihlobo ezafumana ingcwaba ligejiwe lesidumbu somntwana singasekho.
Izihlobo zahle zayabikela amapholisa.
Isikhulumi samapholisa elizweni lonke uAssistant Commissioner Paul Nyathi uqinisekise udaba lolu.
Ithuna eligqekeziweyo
“Amapholisa eChisumbanje aphenya icala lokugejwa kwengcwaba kanye lokutshontshwa kwesidumbu mhlaka 6 Nkwenkwezi esiqintini seMusaonyerwa.
Ingcwaba elagejwayo ngelosane olulenyanga ezilitshumi lambili olwabhubha mhlaka 7 Nhlolanja lonyaka.
Isidumbu akwaziwa ukuthi singaphi, amapholisa asadinga. Ongabe elolwazi ngezigelekeqe ezidale icala leli sicela abikele amapholisa ngokuphangisa,” kutsho uAsst Comm Nyathi.
Kusenjalo amapholisa eMaphisa adingisisa ngodaba lokubulawa komuntu olwenzakale esiqintini seMazwi ngeSonto.
Umsolwa okucatshangelwa ukuthi uphila lomkhuhlane wengqondo obizwa ngelokuthi Danisa Ncube (37) wasukela uKevin Ncube (54) wamgongoda ngogodo ekhanda kanenginengi.
UDanisa wacina etshaywa yizakhamizi waze waqaleka.
Ababili laba uDanisa loKelvin basiwa esibhedlela lapho abafika babhubha khona. Amapholisa eMarange acubungula udaba lokubulala lapho uTichaona Masibera (38) atholakala ebhubhile ngoMvulo ngemva kokutshaywa ngezibhakela nguHonest Zinombe loPeter Boniface.
Kubikwa kwalavuka uthuli uMasibera ebuze imali yakhe kuPeter Boniface owayethe alinde imota yakhe.
E-Mutawawa amapholisa abophe uCainos Map (33), Doreen Dumbujena (52) Abel Chinyandura (23) kulandela ukubulawa komuntu okwenzakala ngoLwesihlanu eNyakutsamwa Village ePfungwe.
Abasolwa kubikwa batshintshana ukutshaya uMasibera bethi utshontshe ama-battery, ingubo kanye lezicathulo.
