uMthunywa
Ethel Ncube.
BAZAKHOMBA ngophakathi abazali abalabantwana abakhubazekileyo eNtabazinduna nanko phela kuzakhiwa isikolo sabantwana abaphila lobugoga.
Isikolo lesi sizabalabanye abantwana abazabe behlala esikolo kuthi abanye bazabe bebuya bebuyela emakhaya.
UMthunywa ukhulumisane loKhansila weNtabazinduna uMnumzana Bekithemba Qongo oveze ukuba le yintuthuko enhle njalo ezanceda abantwana abaswela imfundo ngenxa yesimo.
Isigoga
“Sithanda ukubonga ama-donor ethu ngokusisiza lokhu abasenzele khona kuyisimanga esingasoze sisikhohlwe. Isikolo siyavulwa maduzane nje ukwakhiwa sesiqeda ukulungisa amaphepha akhona. Mina njengokhansila intuthuko le iyangithabisa ngoba bonke abantwana abasemakhaya bazathola imfundo mahala.
“Ukuhambisa umntwana okhubazekileyo kuyadula kakhulu, umzali ucina egcina umntwana ngekhaya ngoba engelayo imali yokubhadala kukanti akufanelanga kubenjalo. Abantwana bonke abakhubazekileyo kumele bathole imfundo esikolo lesi,” kutsho uMnu Qongo.
Uqhubekele phambili eveza ukuba isikolo lesi sizancedisa ukulungisa ikusasa labantwana.
“Isikolo lesi sizancedisa ukuba abakhubazekileyo babelekusasa enhle njalo benelise ukuba benze eminye imisebenzi ngoba befundile. Izakhamizi ziyakuthabela lokho ikakhulu abalabantwana abaphila lokukhubazeka ngoba imfundo isibalande eminyango mahala nje.
Engikukhuthaza izakhamizi zami yikuthi isikolo sesiphelile singavilaphi ukuhambisa abantwana esikolo ukuze bathole ukuncediseka bazifundele labo babelekusasa eliqondileyo,” kuphetha uMnu Qongo.
