uMthunywa
Thokozile Mbedzi
NGENXA yendlala kulenina lakoChireya eGokwe elimiswe edale lenduna ngemva kokukhandwa ngumkalo litshwathike amabhisikiti eliwathengelwe ngumakhwapheni phakathi kwengubo.
UNkosazana Eveline Muchapondwa kubikwa esekhandwe lamabhisikiti ayewathengelwe ngumakhwapheni wakhe, uJotham Mugovhegwa uthe okwenza wakhomba yikuthi uyalamba njalo umkakhe kalandaba lokumdingela ukudla.
Ekhuluma lentatheli kaMthunywa uMnumzana Edison Muchefa uveze ukuthi uNkszn Muchapondwa ubikele inkundla ukuthi umakhwapheni wakhe wamthembisa ukumthengela ama-biscuits ukuze angabulawa yindlala.
“UNkszn Muchapondwa uthi uhlezi efihla iphakethe lakhe lamabhisikiti phakathi kwengubo ukuze adle nxa esephethwe liphango kungakho kakwazi ukuthi umkakhe wawabona njani.
“Ubikele inkundla ukuthi lokhu ukwenza ngoba uyalamba njalo umkakhe kazihluphi ngitsho ngokumdingela ukudla ngoba uthi ngeke atshone edinga ukudla komuntu ongasuthiyo odla njengengulube. Yikho wacina ebona kungcono ukuba abelomakhwapheni wakhe,” kulandisa uMnu Muchefa.
Induna uChiya Chireya ibuzwa ngodaba lolu ivumile ukuthi lufikile edale layo njalo uNkszn Muchapondwa waveza ukuba konke lokhu ukwenziswe yindlala.
“Udaba lukaNkszn Muchapondwa lufikile edale lami kodwa waveza ukuba lokhu ukwenze ngenxa yendlala ngakho bekumele sigwebe indoda efohle emzini wenye kodwa sesisuke samiswa yikubotshwa kwamabhawudo e-lockdown singakafaki isigwebo,” kuphetha induna uChiya Chireya.
