uMthunywa
Mehleli Dube
IZOLO bekuthi nxa kungaba lemfa esigabeni, bebebuya abantu ukuzokukhalela, inhliziyo zabo zimdambiyana, bemadolo nzima lalapho kuthi nxa kukhulunywa kukhulunyelwe phansi, labahlekayo loba esequnjwaqunjwe kuyini laye wayehlekela phansi indebe zivale amazinyo kungakhanyi angani uyajabula abanye bekhala ezimathonsi ngokulahlekelwa yisihlobo sabo.
Wawuthola lamaxhegu asempunga ethe gozololo kukhomba ukuthi bathithibele. Amaninakazi wawubona ngengubhamazwi lamaqhele, loba kuthiwe abahlabele ngumfundisi amazwi abo ayezwakala ukuholoba ngoba inhliziyo zidabukile.
Kwakuzila ukuphonguklabalala ugcwale yonke indawo angani ngamanzi adubuke ekanaleni. Khathesi angazi kumbe sekubangwa yikuhlangana kwenhlobonhlobo zabantu, sekuyinsakavukela umtshado wezinja.
Ufica umuntu ehleka kuze kukhanye lesilakalaka engagqize qhakala, ungathi mhlawumbe usegigini. Abanye ngabeza bembethe esemvu bezoncedisa ukupheka kodwa empeleni belande ukutshontsha ukudla, uthole sebekuthwele kungamagqibhagqibha bekusa ezindlini zabo. Abazoncedisa lokuzokwejisisa abalahlekelweyo bacine besilela ukudla, unogwaja esekuqukule wakekela ngamaguma aze ayophuma engabonwa muntu.
Eqinisweni uyabe uzithelela umnyama, yikho kwesinye isikhathi wawuthole ingane zakho umendo usala kusukela khonapho, abanye belila wena wetshathe ukudla kwabantu okwempisi ikhumbula abantwabayo.
Bakhona abangane lezihlobo asebesaziwa ngokutshontsha ezimfeni. Nxa ukwenza lokho ngithi kucine ngoba uzokhela umkhokha ozahlupha umdeni wonke, ngenxa yobugovu.
Lokhu phela yibuthakathi, zibuthe nxa usiya esililweni ukhale labakhalayo, kuphela umngcwabo bhekisa amabombo kwenu utshiye abomdeni bexoxa ezabo, hatshi ukuba ulokhu unqwethanqwetha udinga ongakuthwala abanikazi bomuzi baze bayekhulumela phandle kwegedi wena uthe kho endlini.
Ungabi luhelwane uhamba uhwitha into zabantu ezimfeni. Lokugqoka sigqoke into ezisinika ubuntu lesizotha hatshi ukuthola umuntu isibhono siphandle kumbe kukhanya ikhwapha lesibunu.
Ayixabene. 0714355641
