uMthunywa
UJOEY Antipas ufike kuMaZulu ekuqaleni kwesizini edluleyo ngemva kokugila izimanga kuChicken Inn yaseZimbabwe ngesikhathi idlala kuCaf Champions League.
KuMaZulu wehluleke ukuwafaka ku-Absa Premiership njengoba izikhulu zeqembu kudingeke ukuthi zithenge ilungelo leThanda Royal Zulu eyabangumpetha beNational First Division (NFD).
Indawo ka-Antipas ivalwe nguCavin Johnson owethulwe ngokusemthethweni ngoLwesihlanu enkundleni yeMoses Mabhida.
UQedi Dlamini ongumaneja weqembu uqinisekisile ukuthi u-Antipas ubengakakhwezelwa iholo.
“Ngesikhathi kuqala isizini edluleyo umqeqetshi sambekela ukuthi isivumelwano sethu sizokhangelisiswa nxa engafikisa iqembu esigabeni esikhulu. Kodwa ke kwasuka kwabalomnyama wokuthi akazange akwazi ukuzuza lokhu njengoba abaphathi becabanga ukuthi bathenge ilungelo lokudlala esigabeni esikhulu. Besikhangelele ukuthi simnike inkontileka entsha nxa sibona ukuthi wenza kuhle emidlalweni yokuqala yeligi,” kutsho uDlamini.
“Angicabangi ukuthi senza iphutha ngokungamxotshi ekupheleni kwesizini edluleyo. Iqembu like labhekana lenkinga. Yingakho sithe asimnike ithuba ngoba kungenzeka ukuthi inkinga lezi zibe lomthelela ekutheni iqembu lehlelwe yifomu phakathi kwesizini.
“Ngeke sikufihle ukuthi impumela esibelayo ibiletha ingcindezi eyengeziweyo. Ikhempu ebesilayo eMtubatuba yiyo evele yasidweba sacaca isithombe sokuthi azikho izithelo ezinhle ngengqubekela phambili yeqembu. UCavin siqale ukuxoxa laye ngempelaviki edluleyo,” kutsho uDlamini.
Eziphendulela uAntipas uthe: “Kungenzeka ukuthi abaphathi bathole intuba yokuthatha lesi sinqumo ngokuthi bacabangisise izinto ezenzeka ngayo ekhempini.
“Ikhempu ayihlelwanga yimi, ngatshelwa ukuthi zonke izinto sezihamba ngononina. Loba sesibhekane lenkinga akekho umuntu owangitshela ngolunye uhlelo. Ngisola ukuthi ingxoxo phakathi kweqembu lomanenja wami ngokukhwezwa umholo njengoba iqembu selidlala kuPremiership yikho okungixotshisileyo.
“Abaphathi bebethi ngeke bayikhuphule imali yeholo lami ngoba iqembu lithenge ilungelo lokudlala kuPremiership ekubeni umanenja wami ubefuna bangiholele ngendlela okuhola ngayo abaqeqetshi bePremiership.”
Uveze ukuthi selokhu kwathengwa ilungelo leThanda (Royal Zulu FC) kube lokutshintsha kwesimo ebantwini asebenzisana labo okwenze wafikelwa ngumqondo wokuthi kukhona okutshaya amanzi. — Ubulembu
