uMthunywa
NGEZINGCWELE kuphela kule iviki silanda ikhefu lePhasika iphephandaba likazulu elikulethela zona, nanko phela lize leqembu lezokholo elicula uzwe ingani uhlezi lezingilosi oGabriyeli. Kaliculi nje leliqembu liyabulala.
Kambe lingaba yiliphi iqembu ngaphandle kweThe Legit Messengers eliholwa yingilosi uqobo uOzias Sibanda. Othanda ukuba ngcwele nansi ingxoxo elivangeli phakathi kwentatheli uArnold Ndlovu (AN) loOzias Sibanda (OS).
AN: Chathekela uzulu ngamafitshane ukuthi kungani lakhetha ukucula ezokholo Mdawini?
OS: Siliqembu elicula umculo wokholo kakhulu ngoba sisazi ukuthi loba umuntu engabonakala eqine kangakanani ngaphandle kodwa nxa emoyeni engaphathekanga kuhle loba egula, ubuthakathaka lowomuntu, ngalomculo siyaqinisa, siduduza, sijabulisa futhi sisondeza abantu kuMdali wabo ngomoya.
Saqala ukuba lephupho lokucula eminyakeni engabalelwa kwemihlanu silokhu sikucabanga ukucula njalo sibhala izingoma sizibeka kuze kufike lamuhla njengoba sesize sangena e-studiyo senza lowu msebenzi njengeqembu.
AN: Lokhe lasungula iqembu lenu selikhiphe amadlalade amangaki njalo livame ukudlalela ngaphi ingoma zenu?
OS: Njengabantu abasaqala ukucula estudiyo sikhiphe idlalade lethu lakuqala kuyonale iviki mhlaka 27 Mbimbitho esilibiza ngokuthi “Ukuthula” elilengoma ezintathu. Sikhangelele ukuhamba siqhuba ilizwi leNkosi ngePhasika. Ngalokhu lonyaka sikhangelele ukuqhubekela phambili sivakatshela uzulu endaweni ezehlukeneyo sibadlalela ingoma zethu.
AN: Lokhe laqala ukungena kwezomculo abantu bayawuthakazelela na umculo wenu?
OS: Abantu asebeke bezwa umculo wethu bayajabula ngawo njalo basikhuthaza ukuthi siqhubekele phambili. Emnyakeni lo esikuwo sikhangelele ukuthi umculo wethu ufike endlebeni ezitshiyeneyo elizweni lonke jikelele.
AN: Akutsho Mdawini ukuthi licula libangaki eqenjini lenu?
OS: Kuleliqembu leThe Legit Messengers sisebenza sibane; uOzias Sibanda, Bambelela Sibanda, Marvelous Sibanda kanye loMbongeni Dube. Sizalwa ePlumtree esigabeni saseTjibudzana.
AN: Njengeqembu elisasungula bunzima bani eselihlangane labo kwezomculo njalo nkuthazo bani eliyipha abaculi abasasungula?
OS: Ubunzima esihlangana labo kwezomculo yikuthi siswela imali yokuthuthukisa iqembu lethu kanye leyokwenza ama-shows okuyikho okwenza singaphakami masinyane emculweni. Ngalokhu kubaculi abasakhasa ngithi kababambelele loba kunzima babuye bahloniphe uzulu ukuze bathuthuke.
