uMthunywa
Nomthandazo Ndlovu
ABALIMI bakhuthazwa ukuthi balime umbhida wohlobo lwe-Covo ngoba uvuma loba ngasiphi isikhathi somnyaka njalo awuhluphi ngitsho ukulima.
Ekhuluma loMthunywa uNkosazana Margaret Muyambo ongumlimi uthe umhlobo wombhida lo uyadlisa njalo uyavuma loba ngesikhathi somqando.
“Mina yiwo umbhida engiwulimayo njalo lakhathesi ngesikhathi somqando, kusuka kuZibandlela kusiya kuMpalakazi umlimi uyazilimela umbhida lo athole inzuzo ephezulu.
“Ubuhle be-Covo yikuthi amahlamvu ayo abuthakathaka njalo makhulu nxa kuqathaniswa leminye imihlobo yemibhida evamileyo elinywa linengi labalimi,” kuchaza uNkszn Muyambo.
UNkszn Muyambo uqhubekele phambili wathi kulomhlobo weCovo wakulezinsuku obizwa ngokuthi yi-Gold Plus Hybrid Covo yona evuma okwamagama.
“Kulomhlobo wentanga othiwa yi-Gold Plus Hybrid Covo wona ovumayo ngesikhathi somqando.
“Inhlanyelo le sitholakala ezitolo ezinengi koBulawayo ezigoqela iFarm & City Centre labo Prime Seed-Co, yikho-ke lapho mina engijayele ukuthenga khona inhlanyelo le,” kuqhuba uNkszn Muyambo.
UMnumzana Jabulani Ncube onguCounter Sales ePrime Seedco uthe inhlanyelo entsha yeCovo le abalimi kumele bayigijimele ngoba iyadlisa.
“Abalimi kabasukumele phezulu balime umhlobo lo wombhida ngoba ubuhle bawo yikuthi uyavuma sikhathi sonke somnyaka njalo wehlukene leminye imihlobo emidala yeCovo esiyaziyo enjengeRugare,” kuphetha uMnu Ncube.
