uMthunywa
Nkosilathi Sibanda
UMDLALI wakuleli uKudakwashe “Nkembe” Mahachi ubike ukuba nxa iqula labadlali bamaWarriors elikhona okwamanje lingehluleka ukunqoba iCongo ngeSonto, alisoze lithole elinye ithuba lokuncintisa kunkezo yeAfcon empilweni zabo.
Umdlalo useNational Sports Stadium njalo amaWarriors adinga ukunqoba nxa efuna ukuthi ayebonakala kwele-Egypt ngoNhlangula.
UMahachi, otshibilika ekuOrlando Pirates ufike kuleli ngoLwesibili emini evela eSouth Africa njalo ubikele iphephandaba likazulu ukuthi umdlalo wangempelaviki uzatshengisa ukuba amaWarriors “alambe” okunganani njalo ayazi na ukuthi lumdlalo ungaba yisiqalo lesiphetho kuthuba labo lokudlalela isizwe.
“NgeSonto kuzamele sicacise umdlalo wethu. Phela kungaba lithuba lokucina kwabanye bethu ukuthi bafike kulesi isibanga sokudlalela amaWarriors, ngakho ngithi lumdlalo mkhulu okwamagama. Asisoze sathola ithuba elifanayo futhi. Singena kulumdlalo silambile, sifuna ukuyidla iCongo siyephambili,” kutsho lumdlali owafika eGoli esuka koBulawayo kuqembu leHighlanders.
Omunye wabadlali bamaWarriors abathenjiweyo uDanny “Deco” Phiri oyimvimbi yeLamontville Golden Arrows uthe yena ngokwakhe sekumphuzele ukuthi ayefika kumidlalo yokucina ye-Afcon.
“Kambe likhona elinye ithuba eledlula leli? Yisikhathi sethu lesi. Sizakuba liqembu elizasukumisa isizwe ngesikhathi inengi lingacabangeli,” kutsho uDeco.
Uthe kala ngitsho uvalo lokudibana lengcitshi zabadlali abalodumo abagijimela iCongo.
Umdlali lo akulabhola elidlula kuye lula.
Uzafuna ukuthi angahlali ebhentshini mhla womdlalo ngoba wakhutha ukudlala mhla amaWarriors edibana le-Liberia ngomnyaka odluleyo.
Ukuzethemba kwabadlali laba kuza ngesikhathi isizwe sikhangelele kibo ukuthi umdlalo wenguqu ulethe injabulo emphakathini ohlaselwe zindubo ezinengi.
UMahachi uqhubeke wathi kuqakathekile ukuthi abadlali labaqeqetshi babelomqondo munye loba nje kutholakale isikhathi esincinyane sokuthi balolonge bebonke.
“Ukuba lomqondo owodwa kuzabaluleka. ICongo iza kithi ingelamthwalo. Thina silomthwalo ngoba sisekhaya njalo sifuna umklomelo nje. Besibotshelwe kuqoqo elinzima kodwa nanko sesilapha. Akula obesinikeza ithuba.”
UMahachi utsho kanje kulandela ukuhlaziya kwabacubunguli bomdlalo abakade besithi amaWarriors ngeke anqobe.
Iphephandaba likazulu lixhumane lomqeqetshi uSunday Chidzambwa ngoLwesibili emini.
Lumqeqetshi uthe uyathaba ukuba labadlali bakhe abaphetsheya baphange beza ekhaya ukuzohlangana labanye.
AmaWarriors alabadlali abathathu kuphela abatshibilika kumaqembu akuleli, uPetros Mhari unozinti weFC Platinum, uGodknows Murwira (FC Platinum) loRichard Hachiro oweHerentals.
“Inengi labadlali sebekhona. Silinde ukuthi sihlasele,” kutsho lumqeqetshi.
UChidzambwa uzathi ukuhlolisisa abadlali bakhe ababalisa uKnowledge Musona loMarvelous Nakamba encedisana labodokotela.
Abadlali laba, ngokuzwa kukaMthunywa, kubikwa abezwa kuhle emzimbeni.
IZimbabwe iyakhokhela kuqula lika-G njalo ibotshelwe kuqula elinzima elilamazwe ahlonitshwayo kunguqu yeAfrica abalisa i-Liberia leCongo.
Abadlali abakhethwe ngumqeqetshi
Onozinti: George Chigova (Polokwane City, South Africa), Edmore Sibanda (Witbank Spurs, South Africa), Petros Mhari (FC Platinum)
Imvimbi: Divine Lunga (Lamontville Golden Arrows, South Africa), Marshall Munetsi (Orlando Pirates, South Africa), Teenage Hadebe (Kaizer Chiefs, South Africa), Alec Mudimu (CEFN Druids, Wales), Tendayi Darikwa (Nottingham Forest, England), Jimmy Dzingai (Power Dynamos, Zambia), Ronald Pfumbidzai (Bloemfontein Celtic, South Africa), Godknows Murwira (FC Platinum)
Phakathi: Tafadzwa Kutinyu (Azam, Tanzania), Richard Hachiro (Herentals), Marvelous Nakamba (Club Brugge KV, Belgium), Kudakwashe Mahachi (Orlando Pirates, South Africa), Leeroy Mavunga (Yadah Stars), Knowledge Musona (KSC Lokeren Oost-Vlaanderen, Belgium), Ovidy Karuru, Butholezwe Ncube and Talent Chawapihwa (all Amazulu, South Africa), Kelvin Lunga (SV Rodinghausen, Germany), Khama Billiat (Kaizer Chiefs, South Africa), Danny Phiri (Lamontville Golden Arrows, South Africa)
Abagadli: Tinotenda Kadewere (Le Havre AC, France), Evans Rusike (SuperSport United, South Africa), Admiral Muskwe (Leicester City, England), Knox Mutizwa (Golden Arrows), Abbas Amidu (Arar, Saudi Arabia)
