uMthunywa
KUSEHLAKALO esithene abantu amadolo kulomfundisi welinye ibandla elise Kameelrivier eMpumalanga kweleSouth Africa ohlinze waphekela abantu bebandla lakhe inyama yenja okuyisehlakalo esesisolwe zinhlanganiso ezitshiyeneyo kanye labantu nje.
Abantu bathi uvunyelwe ngubani ukuthi enze into elihlazo kangaka khona kusaziwa ukuthi inyamazana akumelanga zibulawe mahlayana nje.
Umfundisi lo uke wahlupha kumaphephandaba kuminyaka edluleyo ngokudlisa abazalwane inyoka ethi iyichokoledi.
Kubikwa umfundisi lo obizwa ngelokuthi Penuel Mnguni wenza lesi senzo ethi abantu kabadle ngoba okwalelo langa inja le yayiyisidlo.
Inja le kubikwa yahlinzwa yaphekwa inyama kanye legazi kwaphiwa abantu ukuthi badle njalo banathe.
Kuvidiyo esabalaliswe kunkundla zokuxhumana amalunga ebandla abonakala ephiwa inyama yenja ekhanzingwe kuhle ezitika ngayo. Kubikwa umfundisi ubethi igazi lenja le lizasilisa abaphila leHIV kanye lemvukuzane.
Umfundisi Giet Khosa wenhlanganiso yeNational Religious Leaders Council ubikele iphephandaba leDaily Sun ukuthi: “Okwenziwa ngumfundisi lo yikuphambana ngempela. Udlala ngengqondo zabantu njalo uyabasebenzisa bona bengakunanzeleli.”
UKhosa uthe abantu akumelanga baphonguku landela izinto abazitshelwa ngabafundisi abazibonayo ukuthi ziyibubhanxa. Uthe inhlanganiso yakhe izahlangana kukhulunywe ngendlela engasiza ukuthi kube lemithetho ezaqondisa amabandla.
“Inhlanganiso yethu izakuthatha inyathelo ukuze abafundisi abanje babotshwe.
Isikhulu sababona ngokugcinwa kuhle kwenyamazana iSPCA uMeg Wilson uthe udaba lolu lukabili; okwakuqala kuhlukunyezwe inyamazana ebandleni leli kuthi okwesibili impilakahle yabantu ingabe isengozini ngenxa yokuhlinzwa lokudliwa kwenyama le okungaphephile.
“Inyamazana zonke zivikelwa ngumthetho. Kumele ziphathwe ngomusa langothando. Bonke labo abatholakala behlukumeza inyamazana balakho ukubotshwa,” ngu Wilson lo.
Inyanga eyaziwa ngelokuthi Dungamanzi ithe lokhu okwenziwe ngumfundisi lo ngumsangano.
“Inja ayaze yasilisa muntu. Kumgceke ukuthi umfundisi lo uzidingela udumo ngendlela ezingayisizo,” nguDungamanzi lo.
Kukhasi lobulembu kuFacebook ibandla leli lithe akusikho lokho okungena emlonyeni okubi, kodwa lokhu okuphuma kiwo.
“UJesu kazange athi isidlo ngamabisikiti lenamunede kuphela nje kodwa wathi ngendlela esimkhumbula ngayo kumele sihlale sithatha isidlo okuyiku thatha umzimba wakhe kanye legazi lakhe,” kutsho ibandla leli kufacebook.
Umfundisi Penuel lo uhlala ephuma kumaphephandaba ngezenzo zakhe ezihlasimulisa umzimba.
Kuminyaka edluleyo uke wadlisa amalunga ebandla lakhe inyoka, amagundwane, wahamba phezu kwamalunga ebandla lakhe manje usebadlise inyama yenja wabanathisa legazi layo.
Iphephandaba leDaily Sun lehlulekile ukukhuluma lomfundisi lo khepha umakhalekhukhwini wakhe udojwe ngelinye ilunga lebandla elithe umfundisi kakhulumi labantu phakathi kweviki, kuzamele adingwe enkonzweni ngeSonto.
