uMthunywa
Sakubona ZulukaNdaba! Kundatshana yethu yakuqala kuleliphephandaba likaZulu, thina abacuphi bamapholisa akuleli aweZimbabwe Republic Police (ZRP), abeCriminal Investigation Department (CID); salazisa ukuthi sizimisele ukusebenzelana ndawonye lezizalwane zakuleli silwisana lamacala kanye lezigilamkhuba ukuze kube lokuthula kulelilizwe.
Silethulele njalo ukuthi amacala adluliselwa kithi, ngamapholisa ajwayelekileyo aweDuty Uniform Branch (DUB) ngagoqela awobuqili bezinga laphezulu (Serious Fraud); ukugqekezwa kwezindlu zokuhlala lezamabhizimusi (Unlawful Entry); awezidakamizwa (Drugs and Narcotics Abuse); ukubulawa kwabantu ngocuku kumbe ngendlela ezingazwisisekiyo (Homicide), ukwebiwa kwezimota (Vehicle Theft); ezokulondolozwa kokuthula (Law and Order) lamanye anjalo adalwa ngumuntu qobolwakhe kumbe esebenzisa imitshina yakulezinsuku (Cyber Crimes).
Izigilamkhuba ezimbili ezantshontsha imali efika phose US$400 000 eTetrad Investments Bank uTitus Nangi (28) loStephen Tatenda Mutongerwa (33) kasikababoni kodwa umzila wabo silawo; qhubekani lisiphathisa Bakwethu siswela imlomo ezinkulungwane eyokulibonga.
Kule iviki, sizaqedisa udaba lobuqili lokweba imali lempahla ethile eyinotho kuZulu ngohlobo olugoqela imali egcinwa nguZulu kumankampani aphanga amsize lapho eyehlelwe yingozi kumbe ngenjongo yokuthi azothola uncedo kumbe enye impahla lapho ingozi leyo itshabalalise impahla eyabhadalelwayo lobubuqili sibuthi yiInsurance Fraud ngesiNgisi.
Kulobu ubuqili, izigilamkhuba zihlasela amankampani la (Insurance Companies) zizenza abawelwe yilezi ingozi ziqamba amanga zijonge ukuhuquluza imali kaZulu. Phela amankampani amanengi lenengi labosomabhizimusi bakuleli, bakulo loluhlelo besenzela ukuthi bavikele ukulahlekelwa yinotho yabo mahlayana lapho bewelwe zingozi zaloluhlobo.
Uncedo lolu, lunikwa kanye lasibi sezimota, izindlu lenye impahla enjalo ekaZulu hatshi amankampani kuphela. Kunjalo-nje, uhlangothi lwamankampani amqoka ekulondolezeni impahla lenotho kaZulu, lulahlekelwa yizigidi zemali ezibizwa yizigilamkhuba, o’tsotsi’ bakwethu, zisithi zehlelwe zingozi, zisenga ezimithiyo.
Izimota yizo ezisengozini enkulu ngakho sinanzelele ukuthi uZulu wakuleli usesenelisa ukuzithengela imota, sathi kuhle sixwayisane lomphakathi ngaloluhlobo lobuqili anduba siye kwamanye njalo amacala esiwaphathayo.
Ukuze siluchaze kuhle uhlobo lwalobu ubuqili, sizachaza indlela omunye u’tsotsi’ antshontshela ngayo enye yalawa amankampani: –
U‘Tsotsi Mkhaliphi’ obengekho kuloluhlelo lokuvikela imota yakhe abeyisebenzisa nsuku zonke esiya emsebenzini, wathi ngelinye ilanga esuka koBulawayo esiya eHarare, wawelwa yingozi yasemgwaqweni eyahlakaza imota yakhe yatshabalala. Nhlanhla yena wasila!
U’Mkhaliphi’ nguye owayelecala kulingozi ngoba wehluleka ukuyiqobotsha kuhle le imota yakhe ejikweni okwayenza yaphuma emgwaqweni yathuza isihlahla. Le ingozi yenzakala mhlaka 8 Nhlangula 2012. Mhlaka 9 kuNhlangula, u’Tsotsi’ wagijima wayabikela amapholisa ngaloludaba olwalotshwa phansi – TAB-21/12, efuna iphepha lamapholisa ayezalisebenzisa ngobuqili.
U’Tsotsi Mkhaliphi’ wayesazi mhlophe ukuthi akekho kuloluhlelo lwe-Insurance Cover kodwa wafikelwa ngumona waloluhlobo lobuqili wazenza uMahlakanipheni. Ngemva kweviki, wagijima njalo wayavula uhlelo lolu kwenye yamankampani la esebenzisa imota eyafa kudala kodwa ekufihla lokho.
Mhlaka 13 Ntulikazi 2012, u’Mahlakanipheni’ lo wethekelela inkampani yakhe le esesithi usefelwe yimota engozini yasemgwaqweni njalo ufuna imali edlula izigidi ezingamakhulu alitshumi lantathu zama-dollar -$13 000-00, wayinikwa.
Eseyitholile imali le, wahle watshaya utshani wagcwalisela ibizo lakhe lokukhalipha ngobuwula kanti kabuzanga elangeni ngoba samdobha emini libalele kwavela konke lokhu ayecabanga ukuthi kusemgodleni; lanxa wayekubona ukuthi kulempondo!
Ezinye indlela zohlobo lwalobu ubuqili kulapho izigilamkhuba ezibika khona amacala amanga emapholiseni zisithi zintshontshelwe ngo’tsotsi’ abahlomileyo emgwaqweni ethile yakuleli ngoba sisazi ukuthi lawamacala asebhahile kulezi insuku.
O’guluva’ laba, o’tsotsi’ phela; sesibatshisela khonapha kuMthunywa! Bathi bangahloma ngalezizikhali zabo zembiko yamanga – amanye njalo amacala esibatshisela wona, bazibone sengathi sebelelungelo lokugila imkhuba mahlayana-nje, bengazi ukuthi bazigwaza ngeyabo imkhonto!
Abanye bagamula izimota zabo ngamabomu belungiselela ukweba enengi kumankampani eInsurance la.
Ngaloludaba Bakwethu sijonge ukulixwayisa ukuthi qaphelani lingaqilwa langoba ngayiphi indlela. Kasixoxisaneni bakwethu ngamacala aloluhlobo aphakathi kwethu sikhona thina abacuphi benu siyaliphathisa ngazo zonke indlela ukuze lihlale ngokuthula kulelilizwe sikhokhelwa yindikimba yethu yalonyaka ekhuthaza ukuthi sisebenze gadalala silondoloza ukuthula kulelilizwe ukuze lithuthuke ngokugcweleyo ethi: ZRP For A Safe And Transforming Nation, ngesiNgisi.
Sithi thina;
(i) Bika lawamacela emapholiseni aseduzane lawe;
(ii) Qaphela ukuntshontshelwa inotho yakho ungananzelele wena qobo lwakho kumbe inkampani yakho;
(iii) Kubanini bamankampani labosomabhizimusi abakuhlangothi lwezamaInsurance sithi, sebenzisani inhlelo ezimqoka ezivikela uzulu olinika imali yokuqhuba umsebenzi wenu ngokugcweleyo lingaqakathekisi ukungena kwayo kuphela kodwa qaphelani licwayisise indlela ephuma ngayo. Lilakho ukuvakatshela amahofisi ethu aweCID silincedise loba ngaphi eZimbabwe yonke jikelele sikhona.
(iv) Ukuthula kwelizwe lonke kudinga ubudlelwano obuqotho balesosizwe ngakho thina abohlangothi lweCID sithi ozondana lokuthula uzondana lentuthuko kanye lenhlalakahle kazulu ngakho uyisitha somphakathi wonke kumele ahlaselwe yilesosizwe sonke jikelele. Lesisitha ( u‘Tsotsi’), silwisana lokuthula ikakhulu ngokudala amacala athize aphazamisa intuthuko, impilakahle lenhlalakahle yabantu.
Injongo yethu yikulwisana lesitha sethu sonke – u‘CALA’ lomdali labazali bakhe bonke o‘SIGILAMKHUBA’.
Umlobi ngomunye wababasebenzela ehofisini enkulu yababona ngezobudlelwano boMphakathi wonke lohlangothi lwabacuphi e-Criminal Investigation Depertment (CID) Press & Public Relations esesigodlweni eHarare.
Phosa elakho laweZulukaNdaba ngeziphathelane lamacala ethulwe kulindatshana. Utholakala kunombolo zocingo ezithi (04) 700171-9 Ext. 3193 / 0735 752 386 / 0713 445 459 / 0782 039 397 kumbe ebulenjini phela ku-email: [email protected] kumbe [email protected]
