uMthunywa
Thando Dube
ABALIMI sebekhuthazwe ukuthi bavikele izifuyo zabo kumkhuhlane we-lumpy skin ngoba uhlasela inkomo ngesikhathi sokutshisa.
Ekhuluma loMthunywa uMnumzana Cosmas Muzunde uveze ukuthi inyanga kaMpandula yiyo inyanga eqondileyo yokuhlaba izifuyo ukuze zingahlaselwa ngumkhuhlane we-lumpy skin.
“Kuqakathekile ukuthi abalimi abafuyileyo bahlabe izifuyo zabo ukuze zivikeleke kumkhuhlane we-lumpy skin. Umkhuhlane we-lumpy skin ngumkhuhlane obangelwa yimiyane ngakho imiyane ivame ngalesisikhathi yikho kuqakathekile ukuhlaba izifuyo ukuze sizivikele emkhuhlaneni lo.
Uphinde wathi i-lumpy skin iyingozi ezifuyweni njalo ingabangela ukuthi zife.
“Umkhuhlane lo ungahlasela izifuyo zicina zisiba lamaqhubu amakhulu emzimbeni njalo zivuvuka emzimbeni.
“Izifuyo nxa zihlaselwe ngumkhuhlane lo ziyehluleka ukudla, lokhu kungabangela ukuthi isifuyo sife kubangelwa yindlala,” kutsho uMnu Muzunde. Uphethe ngokuthi eminye yemithi yokuvikela umkhuhlane lo yi-penicillin.
