uMthunywa
Musa Janga
KULOMLIMI weGwanda ophumelela kwezokulima nanko phela wahamba wayafundela indlela ezintsha zokulima elizweni leChina.
UMnumzana Raymond Mauba uthe ephenduka kuleli wazama indlela zokulima zamaChina wabona ziletha ukuphumelela kanye lenzuzo enhle.
Phakathi kwendlela zokulima ezisetsheniswa nguMauba kule-plastic technology lapho okuyabe kusetshenziswa amaphepha epulasitiki ukwakhela izilimo, ngakho ngaleyo ndlela izilimo zikhula kuhle ngendlela emangalisayo.
UMnu Mauba uthe useke wasebenzisa i-plastic technology le wavuna amatamatisi amahle ngempela okumtshengise ukuthi kuhle ukuzama indlela zokulima zamanye amazwe.
“Ngahamba eChina ukuyafunda ezokulima ngakho safundiswa indlela zabo abalima ngazo enye yiyo leyo eye-plastic technology ngakho ekubuyeni kwami ekhaya ngathi kungcono lathi siyizame sibone ukuthi izavuma. Ngempela ivumile nanko phela sivune amatamatisi amahle njalo amanengi okumangalisayo,” kutsho uMnu Mauba.
Uphinde njalo wakhuluma ngenye indlela ye-intercropping technology. Ubikele iphephandaba likazulu ukuthi le indlela uzayisebenzisa ekulimeni umumbu njengoba sesifika isikhathi sokulima umumbu kodwa lindlela ifuna umlimi aqale afake esinye isilimo engakahlanyeli umumbu.
Uthe uzaqala alime indumba abesefaka-ke umumbu. Lokho kuzenza izilimo lezi zikhulisane ngoba umumbu uzanika indumba umthunzi njalo izilimo lezi zizavikelana ekuhlaselweni yizibungu.
“I-intercropping le iyavundisa umhlabathi njalo izilimo ziyancedisana ekukhuleni, khathesi sesizalima umumbu ngakho sizaqala ngendumba sibesesilandela ngawo. Lokhu kuzenza ukuthi umumbu uphe indumba umthunzi njalo lendumba lazo zizavikela umumbu ekuhlaselweni yizibungu,” kuchaza uMnu Mauba.
UMnu Mauba uthe useqalisile ukufundisa abanye abalimi lokhu akufunda ngesikhathi eselizweni leChina ngenhloso yokuthi abanye labo babelakho ukuthola isivuno esihle.
