uMthunywa
UTHANDO luyamenzisa umuntu ezinye iziga athi nxa sehlezi yedwa ingqondo sezibuyile azibuze ukuthi kodwa kusuke kwathini.
Ayandiza emoyeni amabhodo kuchitheke izitshebo sokulwiwa kubangwa into engekho, loba ikhona nje kodwa phela udlame akusilo lokulungisa lokho okuyabe konakele. Wonke umuntu ulaso isikhwele, lokho phela kutshengisa ukuthi uyamthanda umuntu wakho, awufuni kumabelana labanye sibili. Umuntu uba lesikhwele ngalokho akuthanda ngenhliziyo yakhe yonke, kodwa indaba isuka yonakale isikhwele singadlulisa amalawulo, sifana lesawudo elifakwe ledluliswa, kuduma ukudla okusilela isawudo kodwa lalo lingafakwa ledluliswe hatshi kusuka kungadleki, sinjalo lesikhwele.
Bayalwa abantu lapha phandle bakhumulane amazinyo abanye bavukele ezibhedlela sokulwiwe kwaba luthuli kubangwa ukuthi omunye ubonakale evezela uzibani banyana izinyo. Kambe umuntu akusamelanga axoxe labangane bakhe mhlawumbe ahamba labo esikolo? Khona akulunganga ukuthi abantu balwe ngenxa yezinto zokucabangela nje kungela bufakazi, umuntu ucina sezisola sekonakele, esesithi ngabe ngiqale ngaba lobufakazi ngingakathathi inyathelo leli engilithetheyo.
Phela bakhona abanye obaba abathi omama bangayatheza inkuni angabuya lenkuni ezingathi ziqinile zinde kuhle kuthiwe ziganyulwe ngubani khonale egangeni. Uzakuma njani umuzi kucatshangelwana izinto ezinjalo, okumisa umuzi yikuthembana lokubambisana. Sizakhuluma ngesikhwele nje kanti vele kuyini okubangela lesosikhwele? Sizabasola phela abantu ikanti kukhona inhlansinyana nje ebangela lesosikhwele esizabangela ukuthi ubudlelwano babantu loba umuzi wabantu ucine suphakathi kwamalangabi. Athini unamfana kambe nxa ubaba wabantwana ezageza elume umakhalekhukhwini ngamazinyo? Nxa engasayilumanga ngamazinyo izathi ikhala ukuthi kulomuntu ofonayo umuntu aphume endlini yokugezela ephandlwa yinsipho. Isuka iwuchithe lapho umuthi inkonyane ukuthi kuvele kufihlwani, siyaqubuka lapho-ke isikhwele siwunyonyobele umuzi wabantu.
Kulamanye amadoda athi evela emsebenzini aqale ukukhangela izihlangu zikanamfana ukuthi zingabe zike zanyathela inhlabathi na? Kuyiwa ngaphi? Uthole unamfana sesedale lokuthi kungani egeze wazicomba, pho ahlale eyinhlikibonda ngoba esesaba ukubuzwa ukuthi ubegezela bani? Kube sekusiba labonamfundisi-ke ecaweni, isikhwele siqonge siyekhonale umama secabangela umfundisi ukuthi uzwana lamalunga ebandla esifazane abancedisanayo, kuhle kuthiwe haaa! njengonazibani ongumfelokazi wahamba umkami. Uthole unamfundisi umlomo suluphondo yena kumele abobothekele amalunga ebandla, izimvu zabo phela.
Bakhona njalo abadlala behlaba isilwane ngotshani ezihlalweni, umuntu ancome uNazibani athi uyageza uyabukeka, umuntu engancomi umkakhe. Okwenza uNazibani abukeke yikuthi umkakhe uyamthengela lawomafutha amenza abenje akhazimule. Lawe thengela owakho ungakathelwa ngamafutha abilayo unkosikazi sesithi kutsho ukuthi uthandana laye uNazibani.
Siyingozi isikhwele nxa abantu bengasasinanzelelanga, umuntu uyahlala enguyedwana nje ngokuhlala efuqela abantu abamthandayo khatshana ngenxa yaso. Kungakho kuqakathekile ukuthi abantu bakhulumisane nxa kukhona lapho abangazwisisani khona kulungiswe kungakonakali.
