uMthunywa
ABADALA babethi indlovu iyahlatshiswana kwesinye isikhathi ubezwe bebabaza besithi ikhotha eyikhothayo kukanti izandla ziyagezana. Kule iviki mahlabezulu sithi inyoni zibanjwa zisemaphuphu kukanti amathole akhethwa kusakhanya yikho nje udaba lokuxolelana silubamba umnyaka usaqala kusese masinyane.
Silethulela umbono ngodaba lokuxolelana njalo siveza ukuqakatheka kwakho ngoba phela nxa kungelaxolo isizwe sethu singatshabalala siphele sicatshe njengo mswenya sungene emhlabathini.
Wonke umuntu odalwe ngokwenyama uyawenza amaphutha ngakho ke kumele sikwamukele kunjalo ngoba vele lase mandulweni kwakunjalo uMvelinqangi wakudala kwabanjalo.
Owenza iphutha limvelela njengesela laye enganazeleli ukuthi wenze iphutha kwesinye isikhathi angaziboni acine senanzelela nxa setshelwa ngabanye ukuthi laphaya uphambanisile.
Mahlabezulu ngicela lilalele ngilincwebe indlebe ngoba udaba lwamaphutha solwenze kwaba lezililo lezinhlungu ezinengi phakathi kwethu isisazatho siyikuthi abantu bayehluleka ukuthi bemukele ukuthi iphutha likhona ngakho ke kumele baxole badlulele phambili.
Izimfa sizwa ngazo kusa kwamalanga ngokuthi abantu babulalene isizatho siyinzondo equbuke kibo ngemva kokonwa ngabanye bengahlosanga kube liphutha nje. Kambe sibili sungaze ubhejele ukuthi ubulale umuntu ngoba ekwenze kubi ukhethe ukuyahlala entolongweni impilo yakho yonke kulokuthi uxole udlule kikho.
Endulo okhokho babethi okungapheliyo kuyahlola ngoba basebebonile ukuthi akulanto ehlala ikhona sikhathi sonke okunye kuyaphela, pho wena mfowethu owalamuhla udalwe ngensimbi na ukuthi ngezake ukwazi ukuthi uphosele khatshana inzondo yakho le uxole uyephambili ngempilo.
Kubi kakhulu ukubamba isikhwili kumele sixolelelana ngoba kwesinye isikhathi nxa singaxolanga sicina senze labo abenze amaphutha bacine bezenza kubi empilweni zabo ngoba bekhulelwa yimicabango lokwesaba.
Impilo yendulo ayisafani leyalamuhla ngoba sokulenguquko njalo labo ababeyimthombo yolwazi lwamasiko ethu abasekho kulo umhlaba bahamba befumbethe ulwazi lwabo lonke badliwa ngamagenga lalo.
Abantwana balezi insuku abasafani labendulo ngoba inengi asebekwenza ngokwakungekho ngesikhathi abazali babo bekhula. Inengi lamantombazana akulezinsuku ayazithwala esesemancinyane.
Nxa bekwenza lokho abazali bayazonda bagane unwabu bekhohlwe ukuthi asechithekile awasabutheki ngakho ke kumele babone ukuthi bayaqhubeka njani besiyaphambili. Abazali bayatshingela indodakazi zabo kakhulu baze bafike esigabeni sokuthi bayakhalala impilo zabantwana babo.
“Uyezwa ubaba esithi yena lo okonileyo uzakugcina hamba uyehlala laye”, umama athi uyamncengela umntanakhe njengoba isintu sisithi intandane enhle ngumakhothwa ngunina, uzwe ubaba ephendula esithi
“yimi inhloko yomuzi ungangiphikisa uzamlandela lawe umntanakho”.
“Lokhu kwenza ukuthi umntwana acine ethatha isinqumo sokuthi ayekhupha umthwalo okuvame ukudalela ukufa komntwana lonina osesiswini. Abanye bayabaleka ekhaya bethi bengabeletha belahle umntwana egangeni okuyisenzo esibi ngoba usane alulacala. Konke lokhu kudalwa ngumzali oyehluleka ukuxola.
Amaphutha akhona lakini bazali ngakho ke kumele lihlale phansi likhumisane lidlulele phambili. Nkosazana ungabona ukuthi umkakho uncinda uluju lwemvelo lomunye, hlala phansi ukhulumisane laye aze akubone ukuthi lokho akwenzayo kuliphutha hatshi ukuthi umthakathe aze acine esifa.
Akukho kwabesifazane kuphela lokhu ngoba labesilisa labo bavame ukuthi bengabamba ukuthi omkabo bayaganga bayazonda kakhulu bacine bebenza okubi. Uyezwa kuthiwa indoda eqotho ibulele umkayo yaqeda lapho layo yathatha impilo yayo.
Uthando vele luyajula kakhulu luze lucine lungasela migoqo kodwa ke mzali cabangela ingane zakho ukuthi nxa suzithathele unina qede lapho lawe yise uzitshiye uthi zizagcinwa ngubani.
Sesiyithintile indaba yethu sehla layo ngakho ke kukuwe ukuthi umbono lo uwusa ngaphi, kodwa ke ungakhohlwa ukuthi okuncweba indlebe ngokuthandayo.
Umbuzo engikutshiya lawo ngowokuthi: ungaxola udlulele phambili ngempilo uzakufa na?
