uMthunywa
UKULIMA yinto eqakathekileyo kakhulu empilweni zabantu ikakhulu labo abahlala emakhaya lasemapulazini.
Kuqakathekile ukulima ngoba imuli yalo olimileyo ayisoze ibulawe yindlala ngoba kayithengi impuphu esitolo.
Olimileyo kafi ngendlala ngoba ulakho ukudla lokhu okusuka emasimini akhe njalo kayi kuhlala engocela izihlobo ezisedolobheni ukuthi zimthumezele lokhu lalokhuya. Isitshebo sona kasisweli ngoba ulakho ukuzitshebela ngendumba azilime emasimini akhe aphinde enze umfushwa wolude lowendumba azidlele okwesikhathi eside.
Ulakho njalo lowo olimileyo ukuthi asebenzise amahlanga nxa esevunile ukupha inkomo zakhe ebusika ukuze ziqine zenelise ukuthi zilime njalo ngesikhathi sezulu esilandelayo.
Ngakho-ke kuqakathekile ukuthi abalimi bawusebenze umhlabathi wabo ngoba ukulima kulemali enhle okumangalisayo. Abelungu babekwazi lokhu njalo lokhu bekwazi. Kanti lithi kungani basikhupha endaweni ezilomhlabathi omuhle besisa lapho okulesigwadule khona? Babesazi ukuthi benzani njalo lalamuhla abamhlophe bayawufuna umhlabathi njalo bayazi ukuwusebenza ukuze ubaphe inzuzo ezaletha ikusasa enhle ebantwaneni babo.
Okusuka kudidanise amakhanda yikuba thina abansundu sawukhalela umhlabathi sawuphiwa kodwa khathesi abanye abalimi bahleli phezu kwezandla bazibhuqela obukabhuka, bavuka ekuseni bakhangele isibhakabhaka qede baziyele ematshwaleni lakubangane ngoba phela bethi izulu alikathembisi.
Kuzakuthi mhla litshaya phansi kuyikhona begijima bebamba lapha lalaphaya bacine bengasatholanga isivuno abakade besikhangelele. Abalimi laba sebanika abansundu ibizo elibi ngoba phakathi kwalabo abaphiwa amapulazi amakhulu kukhona abangasenelisi khona ukulima indima eyodwa uzwe abantu bethi: “kudala kusalima ikhiwa wawufica insimu le iluhlaza tshoko kusetshenzwa mdala, kodwa lokhe laphiwa uMhambi akulalutho oluphumayo.”
Kuyayangisa lokhu Mthwakazi njalo kutshengisela ukuthi ubuvila bulokhu buzihlalele ngaphakathi kwethu. Kambe umuntu angathi waphiwa ipulazi nguHulumende azihlalele athi pekle kulokuthi asebenze. Phela nxa usebenza nzima awuzilimeli wena wedwa, ulimela abantwabakho lesizwe sakho.
Lokhu kudabula umoya ngoba kumgceke ukuthi isizwe asisoze sithuthuke siyengaphi ngenxa yabantu abahlala phezu kwemali.
Abanye uthola bekhala ngokuthi kabalayo imali yokuthenga inhlanyelo kumbe eyokudinga abantu abazabasebenzela okuyinto emangalisayo ngoba likhona ibhanga elibhekane labalimi elithi minyaka yonke ngesikhathi sokulima libaboleke imali.
Ezinye njalo inhlanganiso ezizimeleyo ziyabe zibaholisa inhlanyelo.
Yebo abanye abalimi siyaziqhenya ngabo ngoba phela bewusebenzisa umhlabathi hatshi okokudlala.
Imali abazikhuphayo kunye labazebolekayo bethenga inhlanyelo kunye lemithi yezifuyo zabo bayazi ukuthi zizaphindela esikhwameni sabo nxa sekuvunwa.
Iqiniso okumele silazi yikuba akula enye inotho esingayithola ukwedlula ekulimeni. Isifiso sethu-ke ngesokuba abantu bancedisane labalimi benze wonke amalungiselelo angabe esenziwa ukwenzela ukuthi mhla izulu litshaya phansi sonke sibobotheke kungabi lomuntu ozabamba ikhanda ahlabe umkhosi.
Kungakho-ke silethemba lokuthi abalimi bazasebenza gadalala ukuze kumnyaka ozayo abantu bakholise ihlobo njalo kungaswelakali mumbu elizweni.
