‘UMAPHEPHA ASIMFUNI’

‘UMAPHEPHA ASIMFUNI’

0 288
Ernest “Maphepha” Sibanda

Intatheli kaMthunywa
LOBA uErnest “Maphepha” Sibanda esebike ukuthi laye ufuna ukuvotelwa kusikhundla sokuba ngumgcinisihlalo weHighlanders, kasoze enelise ukunqoba uKenneth Mhlophe.

Lo ngumbono wabalandeli balithimu asebephumele egcekeni ngokuthi ithemba labo likuMhlophe ngoba abafuni ukubuyisela uSibanda kulesi isikhundla.

IBosso izakwenza amavoti okukhetha umgcinisihlalo, unobhala lelunga lekhomithi mhlaka 4 kuNhlolanja.

USibanda wake waba ngumgcinisihlalo wezikaMagebhula kuminyaka embalwa edluleyo. Ngomnyaka ka-2015 wavalelwa ukuthi angene kukhetho kulandela ukwetheswa icala lokungaphathi kuhle isikhwama seqembu, okuyikho okwamxotshisa eqenjini.

Kubikwa uMaphepha wasebenzisa i$25 000 yethimu ukwenza okwakhe kulandela ukuthengiswa komgadli uObadiah Tarumbwa kuqembu leCercle Brugge laseBelgium ngo-2008.

Lakhathesi uMaphepha waziwa ngokuthi wadla imali yeHighlanders.

Uphenduka kumavoti la ngoba isikhathi sokumiswa kwakhe eqenjini sesedlule.

Ekhuluma lentatheli kuliviki uMaphepha ubike ukuba uzalinda ukubizwa ngabantu beHighlanders abalelungelo lokuvota.

Anduba kungenwe kukhetho, iBosso iza kulumhlangano oyiwo ozahluza ukuba uMaphepha ulelungelo lokuvotelwa na.

Abalandeli abaphumele egcekeni ngokusekela uMhlophe, banengi njalo bathemba ukuthi usomabhizimusi lo uzakhokhela uMantengwane.

Bekhuluma lephephandaba likazulu, abasekeli boqobo abalamakhasi okuvota bathe akekho omunye ongedlula uMhlophe.

Omunye umlandeli wodumo obizwa ngokuthi nguTeekay uthe uMaphepha wasebenza kudala ngakho sekufuneka “umthanyelo” omutsha.

“KuHighlanders sisebenza indima sisiyaphambili. Ihofisi kamgcinisihlalo ifuna umuntu omsulwa, ohloniphekayo emphakathini onjengosomabhizimusi uKenneth Mhlophe.

“Kusukela kulisizini, iHighlanders sekumele ibelomthanyelo omutsha,” kutsho lumlandeli owengeze ngokuthi uMhlophe uzavotelwa ngumuntu wonke.

“Sihamba ngoMhlophe. UMaphepha asimethembi ngitsho lakancane ngoba wasiphoxa ngokutshaphaza imali kaObadiah (Tarumbwa),” kutsho uSibangani Dlodlo olilunga leBosso ekoBulawayo.

Kulandela ukusuka kukaMaphepha esiyaqhatshwa yiBantu Rovers, kwaba labanye kuHighlanders abakholwa ukuthi inhliziyo yalumkhokheli ayisekho eqenjini.

“Angiboni ukuthi uMaphepha engana ukuba ngumgcinisihlalo. Kambe ngubani ongafuna ukukhokhelwa ngumuntu owasuka ngalindlela? Asitshintsheni,” kutsho uMlamuli Tshuma osekela eseFolosi.

Ngaphandle kukaMhlophe loMaphepha, omunye ofuna ukuvotelwa nguNkululeko Ndlovu odinga ukuba ngunobhala.

Uzatshikilisana loLawrence Phiri. Kulunga lekhomithi kukhangelelwe ukuthi kuvotelwe uPeacot Ncube olosekelo lweHighlanders Heart and Soul.

SIMILAR ARTICLES

0 88

NO COMMENTS

Leave a Reply