uMthunywa
Yitatheli kaMthunywa
USILILE uBongani Mafu kodwa ubhekane lenkalakatha yomsebenzi kumidlalo esisele kuhlandla lakuqala kuCastle Premier Soccer League.
Umqeqetshi weHighlanders lo usinde ukuxotshwa emsebenzini ngempelaviki ngokunqoba iqembu elincane iWhawha nge 2-0. Besekusele ukuthi akhitshwe emsebenzini kulandela njalo ukukhalaza kwabasekeli. UMafu ubesedonse imidlalo elitshumi elemiklomelo engu-14 kuphela.
NgoMgqibelo wonalo uMafu uzakhuza ithimu enkundleni yeMandava edibana leFC Platinum. Esuka lapho ubizwa yiHow Mine. Kumdlalo weviki letshumi lane, iHighlanders idibana leDynamos. Iqembu elidla amahabula iTriangle likhona kumdlalo wokucina eBarbourfields.
IFC Platinum, iHow Mine, iDynamos leTriangle ngamaqembu okwaziwayo ukuthi angayikutula iBosso kulelihlandla.
Uzasebenzela ukuthabisa abasekeli uMafu. Impilo yakhe kuHighlanders iphethwe ngabadlali bakhe.
Kungehlula ukuthi abadlali batshibilike okuzathabisa abasekeli, uMafu engahle evalelise iHighlanders loba nini.
UMthunywa uyakubika ukuba inhlanganiso zabalandeli beHighlanders zisasola ukuqeqetsha kukaMafu loba enqobile. Ingatsha zabalandeli laba zisabalale izwe lonke laphetsheya.
Isinqumo esikhona kubikwa uMafu sekumele anqobe amathimu amakhulu ukuze abasekeli bakholwe ukuthi ngempela ulakho ukuthwala inkezo.
Abasekeli abaseSouth Africa abasanda kuqoqa kakuhle inhlanganiso yabo bathi uMafu kanikezwe ithuba kodwa abone ukuthi uyalisebenzisa ngokunqoba.
IHighlanders Heart and Soul layo elugatsha kwabasekeli iphikelele ngokuthi uMafu usaselomthwalo wokubasukumisa emagumeni.
Ukukhala kwabasekeli mhlawumbe ngeke kusize nxa inkokheli zethimu zithule ngoMafu.
UMafu uzakhuluma ngekusasa yakhe kuBosso lamaqhinga alawo wokunqoba lamuhla. Kukhangelelwe ukuthi atshele intatheli ukuthi ucabangani.
Abacubunguli balinganisa ukuqeqetsha kwakhe lokukaMohamed Fathi owafika wavoxa udaka ngo2012.
Esayina isivumelwano sokuqeqetsha, umqeqetshi lo wanikwa umlandu wokubamba imiklomelo engu-18 kumidlalo elitshumi.
Ukunqoba iWhawha kwehlise iphika kubalandeli beBosso abakade bengathembi ukuthi uMafu labadlali bakhe bazenza okungcono eBF.
