uMthunywa
Nkosilathi Sibanda
ZIYEHLA ziyatshelela ezikaMadinda Ndlovu kulimpelaviki eqonde esigodlweni lapho iqembu leHighlanders elizangqikilana khona leHerentals kumdlalo wesibili weCastle Lager.
IHerentals iyachinsa ukuligiqa enkundleni zePSL njalo leliqembu seliphiwe ibizo lokuthi ngo-school boy.
Ukudlala kwalo leBosso akungeke kube ngumdlalo ongabethusa “abantwana besikolo” ngoba layo iBosso ibuthelele abadlali abasakhulayo abaqabuka iPSL.Umdlalo lo uzahlabusa ngoba umqeqetshi weBosso uNdlovu usekhulume kanengi ukuthi uzawatshaya amaqembu.
Kweminye imidlalo, koBulawayo akubizwa ozwayo ngesikhathi iBulawayo Chiefs inxuse iCaps United enkundleni yeLuveve. IChiefs ingabe isevalweni ngoba ayikaze idibane lenkunzi zikanobutshuzwayo ezathwala inkezo ngesizini ka-2016.
Lo yiwo wodwa umdlalo okhona koBulawayo kulimpelaviki. IBulawayo City ivakatshela eRufaro ibizwe yiHarare City.
Inhlanganiso yePSL ibika ukuba iqedile ukufundisa amaqembu ngokuqakatheka kohlelo lwe-Club Licensing olufuqa amaqembu enguqu ukuthi abunjwe njengamabhizimusi.
Imidlalo ekhona kulimpelaviki:
NgoMgqibelo: FC Platinum v Yadah (Mandava), Black Rhinos v ZPC Kariba (Rufaro), Mutare City Rovers v Chapungu (National Sports Stadium), Harare City v Bulawayo City (Rufaro), Nichrut v Chicken Inn (Ascot)
NgeSonto: Herentals v Highlanders (National sports stadium), Triangle v Ngezi Platinum (Gibbo), Dynamos v Shabanie (Rufaro), Bulawayo Chiefs v Caps United (Luveve)
