uMthunywa
Nkosilathi Sibanda
“Njengoba kuliqembu le-ECD, abadlali balandele isixwayiso sikambalisi . . . ,” kutsho uMadinda Ndlovu ebuzwa ngendlela abamba ngayo iqembu lakhe leHighlanders mhla lisidla iDynamos 1-0 ngekhefu lePhasika.
Umgadli osephathwa emilonyeni yabantu uOzias “Ozozi” Zibande ugaxe ibhola elilodwa entanjeni, okuyilo elehlukanise amaqembu womabili kumdlalo weligi yeCastle.
Ibhola likaZibande leli lisuke enyaweni zomfana oza ngomfutho uMacClive Phiri.
Ukunqotshwa kweDeMbare akuphathanga kahle uzhizhi lwabalandeli bayo abangakholwa lakhathesi ukuthi batshayiwe egumeni labo.
Kubalandeli beHighlanders, ilanga langoMvulo libakhumbuze iqembu labo lakudala, elalinqoba mihla yonke, lithwala lenkezo. Umqeqetshi uMadinda usethole inhlonipho ngenyathelo lakhe lokudlalisa abafana abasakhulayo abangela mabizo alodumo.
NgeSonto iBosso idlala leqembu eliqabuka utshani bePSL iNichrut eBarbourfields. Lo ngumdlalo ongethusiyo ngoba iTshilamoya isekhaya kodwa umqeqetshi wayo uthe akulaqembu alidelelayo.
Ezinye eziphuma koBulawayo ezisekhaya kumdlalo wesihlanu weCastle Lager yiBulawayo City enxuse iBlack Rhinos eMagumeni ngoMgqibelo.
IChicken Inn iqonda eNgezi Platinum ukuyadibana leqembu elilenkani. IDynamos ibambe uvalo isiyahlasela iZPC Kariba enkundleni yeNyamhunga.
Imidlalo yeCastle Lager kulimpelaviki:
NgoMgqibelo: Bulawayo City v Black Rhinos (Barbourfields), Ngezi Platinum v Chicken Inn; (Baobab), Harare City v Bulawayo Chiefs ( Rufaro), Yadah v Triangle ( National Sports Stadium)
NgeSonto: Highlanders v Nichrut (Barbourfields), Chapungu v FC Platinum (Ascot), Shabanie v Mutare (Maglas), Caps United v Herentals (National Sports Stadium)
