uMthunywa
Yintatheli kaMthunywa
KULENDODA yeChipale eBinga ezonde yagana unwabu ngemva kokuthola umngane wayo encinda uluju lwemvelo lomkakhe.
Udaba lolu luvele emavikini amabili edluleyo lapho uMnumzana Thembisani Nleya athole umngane wakhe uJoel Banda ezikhohlisa lonkosikazi wakhe, uMercy Nleya.
Elinye ilunga elikhulume loMthunywa uNkosazana Edith Nleya uveze ukuba abalamathe ngesenzo sikaMercy.
“Saphela amandla sisizwa ngesenzo sikamakoti esokukhomba umngane womkakhe. Umkakhe wathi efika evela gamula eguswini wathola umngane wakhe ezincindela uluju lwemvelo lomkakhe.
“Uthi watheneka amadolo wadobha izigqoko zomngane wakhe waziphosela emlilweni ngemva kwalokhu wazihlalela phansi.
Kubikwa wathi ebuzwa ngumkakhe wathi bayathandana.
“Mina ngathi ngimbuza sibabili wathi umkakhe kamsuthisi emacansini njalo uyadakwa kakhulu,” kubika uNkosazana Edith.
Intatheli ixhumane loMnumzana Thembisani Nleya onguye owathola umkakhe elele lenye indoda ochaze ukuba uzwa ubuhlungu ngesenzo somkakhe.
“Ngendlela engangizonde ngayo lomuntu ngangingambulala sibili kodwa ngathi ngiyakhangela ngabona umuntu ayelaye ngumngane wami engimthembayo kakhulu.
“Angizange ngimfake isandla ngehlisa ulaka lwami ngokudobha impahla zakhe ngafaka emlilweni ngazithulela waphuma enqunu eqonda emzini wakhe.
“Khonapha kwakusemini ilanga libalele mina ngiseguswini ngezwa kusithi ngiphenduke ngadobha ihloka lami ngaqonda emzini wami ngathola izindlu zonke zivaliwe ngaqonda kweyokulala ngifuna ukuyaphumula kanti ngizathola okungangoTshaka,” kubika uMnu Nleya.
Uqhubekele phambili echaza ukuba udaba lolu lumthelela ihlazo lokuba semphakathini.
“Isenzo somkami singehlisa isithunzi emphakathini, aluba nje wangitshela ukuthi kangimsuthisi kulokuthi ayelala lomngane wami.
“Ukumxotsha angimxotshi ngiyahlala laye angimtshayi futhi yena kumele alungisise amaphutha akhe lami ngizakwenza umsebenzi njengesifiso sakhe,” kubika uMnu Nleya.
Iphephandaba likazulu lixhumane loMnumzana Joel Banda onguye owatholakala encinda uluju lwemvelo lonkosikazi womngane wakhe othe akulanto enjalo eyenzakalayo.
“Ngamanga ukuthi ngatholakala lonkosikazi womngane wami, ngiqala ukukuzwa ngawe lokhu. Ukuthi ngabonakala nginqunu emini ngisiya emzini wami kuliqiniso ngoba izigqoko ngazikhululwa ngabantu bezihawukela,” kuchaza uMnu Banda.
Ekhuluma loMthunywa uNkosikazi Mercy Nleya onguye owatholakala lomngane womkakhe uphike wemba phansi.
“Angazi lutho ngalokho njalo angilakho engingakubikela khona, abantu bakhuluma izindaba ezingaqondananga labo, bazachitha imizi yabantu,” kuphetha uNkkz Nleya.
