uMthunywa
Gladmore Ncube
KULEZELAMANI zelokitshini leCowdray Park koBulawayo ezixabana ukusa kwamalanga kubangwa ukuthi omncinyane wethesa udadewabo umlandu wokumvala inzalo ukuze amthathele indoda, uMthunywa ukuzwile lokhu.
UMthunywa uzwe ukuthi uNkosazana Msindazwe Dlamini usola udadewabo uNkosazana Zwelibanzi Dlamini ukuthi nguye omenza angazali ngoba ufuna ukumthathela indoda.
Iphephandaba likhulumisane loMnumzana Talic Chiriso ongumpostoli okhulekisa abantu enhlane othe yena utshela abantu akuboniswa yiNkosi kodwa uzwa ubuhlungu nxa izelamani sezisilwa zibanga lokhu yena akuboniswayo.
“UNkszn Dlamini wabuya enhlane lapho engikhulekisa khona abantu emavikini amathathu adlulayo wacela ukuthi ngimbeke izandla ukuze athole inzalo ngoba abasazwanani lomkakhe.
“Ngamkhulekela ngathola ukuthi angeke wathola abantwana ngoba isibeletho sakhe sagangelwa. Ngamchazela ukuthi ukuze abe lenkinga le wagangelwa ngumuntu oyisihlobo sakhe ahlala laye endlini lomkakhe yena wazichazela ukuthi lowomuntu ngudadewabo vele ufuna ukumthathela umkakhe.
“Ngamnika umthandazo wokuthi umoya wokuthi umkakhe amtshiye ungabikhona ngaphinda ngamxwayisa ukuthi angaze walwa lodadewabo.
“Ngiyamangala nxa ngisizwa ukuthi ngeviki edluleyo bekulwiwa. Mina angizange ngathi baxabane, ngenza umsebenzi wenkosi kuphela,” kuchaza uMfundisi uChiriso.
Intatheli ikhulumisane loMsindazwe oveze umona lomhawu udadewabo akhula elawo.
“Akungimangalisi ukuthi udadewethu wangithakatha ngoba lakudala sisakhula wayevele elandelela amajaha ami engidlule kiwo ethandana lawo okuveza sobala ukuthi uyabe evele ebahawukela ngithandana labo.
“Wasuka ekhaya koMambale ePlumtree wazohlala lathi esithi sediniwe yikuhlala ekhaya yena esazi ukuthi ufuna ukungithathela umkami lenzalo yami. Sengileminyaka emibili ngizama ukudinga umntwana kodwa kuyala.
“Lokhu kwangihlupha kakhulu ngaze ngabona ukuthi ngidingisise ebantwini ngathola ukuthi udadewethu nguye olesandla ekusweleni kwami inzalo,” nguMsindazwe lowo.
“Okungenza ngikholwe lokhu yikuthi umkami ngumalayitsha ngakho nxa ebuyile ehambisa impahla emakhaya udadewethu uhlala esithi bayahamba bonke ngoba ufuna ukubona indawo. Kwesinye isikhathi kuyahanjwa amalanga amabili. Ngizibuze ukuthi angaze akhethe ukulala emoteni esithi ubona indawo.
“Lokhu kuveza ukuthi uhahabela umkami. Ngeviki edluleyo ngixabane laye ngamxotsha endlini yami ngoba nxa ngimbuza uyaqholoza njalo katshengisi ukuthi engikutshoyo kuyamthinta, uyabe ezithulele,” kuchaza uNkszn Msindazwe.
Intatheli ikhulumisane loNkszn Zwelibanzi ogconwa ngokuthakatha umnawakhe olandule wabambaphansi esithi yena kathakathi.
“Umuntu nxa evele engasakufuni endlini yakhe wenza njalo. Angikaze ngimthakathe mina njalo nxa ufuna okunengi ngalokho akutshoyo landa amapostoli akhe lawo yiwo alolwazi ngalokho mina angilalo.
“Sisakhula angizange ngiqonywe lijaha lakhe mina lokhu kwenzakala kanye umfana wakhona aze adlale ngathi,” kuchaza uZwelibanzi.
Imizamo yokukhulumisana lomkaMsindazwe ongumalayitsha yehlule.
