uMthunywa
Vusumuzi Ndlovu
Isihloko: uBulawayo
Abaculi: Cal_Vin/GTI/Albert Nyathi/SotshaFire
UKUDIBANA kwabahlabeleli (abadala labatsha) kuleli kubalulekile ngoba ukuhlangana kwemiqondo lemibono yabo kukhulisa umhlobo womculo ophuma kwelakithi njalo kukhulisa ukucwephesha kokuthumeza kwemibiko ngomculo njalo usijabulisa.
UBulawayo yingoma ekhutshwe ngeviki edluleyo ngamakhanda amane ahlangenele umkhankaso, indumiso lothando lukaBulawayo. Lingoma yenziwe nguMgcini Calvin Nhliziyo odume ngegama uCal_Vin. Lapha usebenzisane loGTI, umkhandi ngoma uSotshaFire, njalo lembongi, ubaba uAlbert Nyathi.
UCal_Vin ubabaza ukuziqhenya kwakhe ngoBulawayo, indawo yakhe yomdabuko, isithandwa sakhe samampela, usofa silahlane. Uthi konke okwakhe uBulawayo kuyabukeka, etsho ngentombi lezitalada zakhona. Ubuhle besigodlo sikaMthwakazi kulingoma bubatshazwa ngamagama ahlakaniphileyo, acacileyo, kuhlanganiswa isiNgisi leSiNtu. Lingoma ihlanganisa umdumo weAfrobeat, kuhlanganiswa lobuciko bokwethula ingxoxo ngenkondlo olwe-hip-hop.
Kusahluko sakhe uGTI ngamafitshane kulingoma udumisa indlela uBulawayo amumethe imbali, usiko lokuhlanzeka, kusukela emalokitshini eBurnside kuze kufike eMakokoba. UGTI ngumculi ophansi kweqembu leKT (Kontrol Tribe), elikhokhelwa nguCal_Vin. USotshaFire ngumculi osebenzela eKapa (Cape Town), Mzansi Afrika okwamanje njalo laye ukuqembu leKT.
Imbongi uAlbert Nyathi uyacina ngesakhe isahluko sengoma engena ngenkondlo, ebabaza imbali lomdabuko wakhe uBulawayo ethi ngu “mafavuke njengedabane”.
Uyadumisa amakhosi ngezibongo zawo uLobhengula loMzilikazi, amakhosi omdabu. Uyabuza ekhombisa ukudana ukuba kwenzekani koNthuthuziyathunqa, ngoba engasabuboni ubuhle lobukhosi obaziwa ngoBulawayo. Uyabuza ethi “Ziphi intuthu zakho Bulawayo?, Yebo zazithunqa izolo,” emaphethelweni engoma.
Ngamazwi akhe uCal_Vin uthi ukusebenza loNyathi, ongumhlonitshwa wakuleli kwezomculo kuyamkhulisa lokumjabulisa, yena phela wakhula embona kumabonakude ngensuku zengoma yakhe uSenzeni Na? Uthi lelithuba alitholileyo lokusebenza laye limupha intokozo enkulu njalo yena, uGTI loSotshaFire bayengeza ulwazi njengabasakhulayo kulinkundla yomculo.
UCal_Vin uthi engafanisa uBulawayo okwentombi ayithanda okwamagama, njalo angasoze acabange kabili ngayo loba nini njalo engafuni kuzwa lutho ngayo. Ngitsho lomfanekiso waleliCD ubonisa ubuhle bamabhilidi lezitalada zesigodlo sikaMthwakazi.
Silitshayela ihlombe majaha, liqhubeke lisenza imisebenzi ebukekayo okwaloluhlonzi.
