uMthunywa
Tina Lobs Buhegwedu Dube
Tondila mbeli titangisa patakasiya mutshipi yakapela kwatakatakalinga nezwantolo tihakisisa kuti ndikupi kulelu, butjilo gwanasi kene gwabobatategulu nabokuku. Tisingazibe kana kuna bamwe basingazibe kuti kuku ini kene kuti batategulu ini. Hapa bebona nhu wakakwegula banobona kunhu kusitjina n’hingo bekangan’wa kuti wakatongoba nhhuhha waka etshamba pasi kuka zunguzika basikana bakalila, embala bhurugwi linampopotho unotjeka nhuzi. Nowha beti “kati yetji tjidala tjemavudzi emvumbu tjohakani mudoropo, thaka dzatjo dzaba newhombela hanu, hanu kanyi” bejalo bekangan’wa kuti nayibo kowhobahhila hapa mhahha yebutjilo ilipo.
Tjinohha tjoga hakuna kuhhe kwekwegula. Hapa tjilikadzikulu basikana nowha bethi “atjitofilani tikatongopalalana nelulebo.” Banojalo banasi, kana ape kusafa iye nhu wakhona, fa unokutola akakuthama tjinhu tjitukununu nowha eti “ah! ah! wanolisa madada”. Hatizi pamwe ndikonaka kwezwa nasi.
Apa tilingisisa nebukulu, butjilo muhango yose gonda guba gulelulelu. Tjinotilemela tjin’ompela. Zwinhu zwanasi zwabazwinjisa.Tokon’wa zwipedza kene zwithama zose pahhuba lin’ompela. Bulemo gwakahhabo neleluka kwezwinhu. Nhu wanasi unoyizela anyala apela iye ahwa aligele. Tjawunyadza ungahaka ukahaya koga iye akanyala kwemalebeswa. Unogala ati engina ehaka tiyi yodusa manyalo. Wantolo waka enyadziwa nekuti wahwa ehaka n’ombe, evima etatamila bohulo mumakula kene ahwa epfula mahanhu nemapadza. Apa alinkadzikulu pamwe wayehokola, ekhwa kene esunga buhwa. Kose kwaka kulimihingo yakalingikala. Waka ungayipedza apa uda muhhuba lin’ompela ukatongowana lubaka gotambabala muntuzi kene gonon’wa ndale ukazana ndazula.
Lubaka gonokumba waka uguwana. Tjinolema kwakakusina.
Nasi butjilo gwedu gwaba gulelu mugumwe lutabi. Koga mugumwe gwakahha nebulemo. Dzene lubaka gunotogwa nehhuba apa libhuda lidza linongina kunammayi gutatamudzika toba titatamudza kudze tizibe pedza zose zwinohako pedza muhhuba lin’ompela. Zwinhu zwetitihhila nebunji. Kwaba nedzihala, noti utjigele kuhha mbiko kuyi tanhomwe batjinyika. Utjakahangana n’holo bekutumila lukwalobo muna iyeyo hhala bekunhingo kuyi nohakika tjinyolotjo. Dzene kusi iyo hhala bose ibabo banhu banobe basakuwana. Kene kulipakati kobusiku nowha ngringri yolila. Imi busiku ndakatjizwidiya dzima. Zwinotikala muhango tohakazwiwha. Nhu unolingilila TV, ngeno ebala phephandebo. Unohaka lingilila kuti kuNgilandi dzazana tjini? Muhhuba ilelo unohaka ziba kuti TB Joshua wati kowotikalani. Nangeno unohaka kwala lukwalo gunonda kuMthunywa. Kutshipi bakawunlindila kuti abape dama loNdzimu. Kunhingo uno hakika nelubaka. Kugubungano lebiganyana bakawumilila. Kose kohaka nhu un’ompela. Akutakulelulelu kuti ukuthame kose kakale kokusimila kuti usiye kupi. Ungawonda n’holo ukatjenamisa banhu.
Kalanga Language and Cultural Development Association [email protected] +263 772 610 726
