uMthunywa
Thando Dube
ABALIMI sebekhuthazwe ukuthi balime i-sugar snap peas ngoba umumo womkhathi uyavuma njalo alemali engathi ithe xaxa.
Ekhuluma loMthunywa uNkosikazi Dorothy Mpofu uthe isikhathi somnyaka esikuso siyavuma ukulinywa kwendumba lezi ngoba zingamelani lesikhudumezi kanye lelanga elinengi.
“Ngenyanga kaNkwenkwezi kusiya kunyanga kaMfumfu yisikhathi esilungileyo sokulima i-sugar snap peas.
“Isikhathi lesi silungile ngoba lezi indumba azithakazeleli umumo womkhathi olesikhudumezi esinengi kakhulu njalo ukuze zikhule kuhle ziyalifuna ilanga kodwa hatshi elinengi ngakho kunyanga zonalezi ilanga eliphangisa ukutshona masinya ziyavuma.
“Isikhathi lesi siyavuma ngoba lezi indumba azifuni bumanzi obunengi ikakhulu ngesikhathi zingakatheli impoko ngakho umkhathi owomileyo zihambelana lawo. Umlimi kuqakathekile ukuthi abone ukuthi uyathelela okulingeneyo,” kutsho uNkszn Mpofu. Uqhubekele phambili wathi indumba lezi zikhula kuhle emhlabathini ongalinywanga kwatshona kakhulu.
“Umlimi olima indumba zomhlobo we-sugar snap peas kufanele alime isivande sakhe kodwa hatshi atshonise ikhuba kakhulu ngoba kungavimbela ukuthi zimile kuhle njalo zikhule kuhle ngoba kuyabe kutshone kakhulu.
“Okunye umlimi angafanelanga akwenze yikuzifakela umvundiso we-nitrogen laloba ngasiphi isikhathi ngoba umhlobo lo wendumba usenelisa ukuzenzela i-nitrogen emkhathini.
“Ekulimeni umlimi kuqakathekile ukuthi atshiyanise inhlanyelo ngayinye ngayinye nge-5cm kuthi imizila yona itshiyaniswe nge-70cm. Lokhu kuzenza ukuthi izihlahla zendumba lezi zikhule kuhle.
“Okunye umlimi afanele akwenze yikuthi afakele izihlahla zendumba lezi izigodo zokuthi ziyame zingahlali phansi ngoba zingahlala phansi amahlamvu akhona ayabola zicine zingazali kuhle kube lesivuno esingakhangelwelanga.
“Indumba lezi azihluphi ngitsho ngoba umlimi engalandela indlela eqondileyo ngemva kwamaviki amabili uyabe sethola isivuno sakhe esiqondileyo,” kutsho uNkszn Mpofu.
