uMthunywa
Cornelius Luphahla
ONDOFA kulezinsuku bazithwalise nzima izakhamizi zelokitshini leCowdray Park koBulawayo nanko phela sebeze bebonwa emini libalele nguzulu.
Kuyonale iviki ephelileyo izakhamizi zeSigodlweni kulelilokitshi zisele zibambe imilomo yangaphansi ngemva kokuba undofa oziveze ngokuthi nguEarnest Ndlovu ephunyuke ezandleni zomphurofethi wacela ezinyaweni.
Esinye isakhamuzi sakulelilokitshi uNkosazana Silibaziso Ndlovu sichaze ukuthi undofa lo ubesehluphile ngokungenela abesifazana ebusuku kanye lokuthatha ukudla ezindlini zabantu.
“Undofa lo ubesehluphile sibili ngoba ebusuku ubengenela abesifazana alale labo. Ubusithi nxa ulele uphuphe ulowesilisa uthi uphaphama ubone umnyango uvuleka njalo uzizwe ukuthi ngeqiniso ubulele laye,” kuveza uNkszn Ndlovu.
UMthunywa ukhulumisane loMnumzana George Tshuma, esinye isakhamuzi sakule indawo sachaza njalo ukuthi undofa lo kucatshangelwa ukuthi ngowesinye isihlobo sakhe esabhubhayo ngoba wayekukhuluma lokho.
“Undofa lo kukhanya angathi ngowesinye isihlobo sami esabhubhayo ngoba laye wakukhuluma lokho mhla abaphurofethi bezambamba. Bathi bengena kuleyondlu undofa lo wathi ngeke bamenze lutho ngoba yena unguEarnest Ndlovu njalo watshiywa ngumninindlu owathi agcine indlu abe ngubaba,” kutsho uMnu Moyo.
Uqhubeke njalo waveza ukuthi undofa lo kwathi sokufanele abanjwe waqala ukubajikijela ngamatshe baphuma endlini le bebaleka.
“Undofa lo wathi ebona ukuthi abaphurofethi sebesendlini wabajikijela ngamatshe bathi bephuma phandle laye waphuma wathi sesiyahlala ekhaya kibo eSigodini. Ngemva kwalokho abaphurofethi bathi sebethiya ukuthi engabuya abanjwe afe,” kulandisa uMnu Tshuma.
UNkosazana Primrose Mkwapatira ongumntwana wakule indawo uchaze ukuthi besebethwele nzima ngondofa lo.
“Undofa lo ubesehluphile ngoba lathi esingamaziyo ubebuya ezosihlupha ebusuku. Engxenye vele sowasithelela ingculazi njengoba ubelala labantu abanengi kungenzeka ukuthi ubeselalo laye,” kuchaza uNkszn Mkwapatira.
UMthunywa ubuye njalo wakhulumisana lomnini wendlu le eyayilondofa othande ukubizwa ngokuthi nguMaMoyo waveza ukuthi undofa lo wayengamazi kodwa wamuzwa ethi watshiywa ngumkakhe.
“Undofa lo angimazi kodwa ngamuzwa ekhuluma sekulabaphurofethi engangibabizile ethi ngowalapha wabuya njalo wathi isibongo sakhe ngesakoNdlovu njengomkami. Angazi kumbe ngabantu ababemgcinisile,” kuphetha uMaMoyo.
