uMthunywa
UKUPHELA kwenyanga kukhomba ukuhamba kwezinsuku, kwabanye kuza lenjabulo lentokozo ngoba bezakwamukela iholo labo bafeze izimiso zabo abazimisa umnyaka uqala. Kwabanye ukuphela kwenyanga kuletha usizi lokujabha kwenhliziyo, kumlimaze umuntu emoyeni ngoba esecabanga ukuthi ingane uyozondla ngani. Namhla nje ngizagxila kakhulu kubafana benkomo labosisi abasebenza ezindlini.
Yibo esenginanzelele ukuthi bayahlukuluzwa kakhulu ngokungaholiswa ngesikhathi. Ithi inyanga iphela uzwe kuthiwa usibani banyane omqhatshileyo kakathumezi imali, yona mhlawumbe isibuye kudala bazidlela abasileyo njengesikhwehle sakogasa. Angaze atshengisele ukucunuka uzwa esekhunjuzwa ukuthi angakhohlwa ukuthi udla mahala, ageze, embathe mahala.
Kwesinye isikhathi uzwe kuthiwa kulenkomo eyafayo ngenyanga ephelileyo, kungakho uzabanjelwa iholo njengesijeziso, loba nje umnikazi kunguye ongazange athenge imithi ngesikhathi etshelwa ukuthi ikhona ephambana lezinye, ngoba kanengi ungabona iphuma kwezinye kuyabe kukhona okutshaya amanzi.
Atshudule umntanabantu engaholi lutho, lokudla ephiwa ngozipho, ngapha ufuna ukuthi nxa engahambanga lazo ekuchakeni atshaye ihloka egamula inkalakatha zembelo yamathetshane lamavikane. Kwesinye isikhathi uzwa etshelwa ukuthi lami lapho engisebenza khona angikakhuphulelwa iholo, etsho ehutsha aluhlaza tshoko njengenyongo yenkunzi yenyathi. Esikhathini esinengi ufica umfana oqhatshelwe inkomo esekhiswa lamanzi abiyiswe lamasimu okuyinto abayabe bengayivumelananga ekuqaleni, ethi esebenza gadalala zelekane izinyanga engaholi lutho umntanabantu.
Khona njengosisi abaqhatshwayo ezindlini uthola ukuthi abanye bathi sebobona ukuthi inyanga sisiya komlindi uyacina umqhatshi afihle loba yisigqoko sakhe somtshado kumbe imbiza, uzwe sekuthiwa usisi nguye ozintshotshileyo yingakho uzabanjelwa iholo. Akhohlwe umuntu ukuthi umntanabantu uyabe evuka ngovivi lukamagadalena esiyabheka uJesu emathuneni mihla ngemihla, eqala umsebenzi.
Angathi uyabuza iholo lakhe ebona inyanga isize yeqela komkabayi, axotshwe okwechalaha elidle uqweqwe lwamaqanda engalukhuni esizafukama, ahambe eyize angani ngumuntu ovela khama ithumbu. Konke lokhu kubangelwa yikungafuni ukubhadala umuntu oncedisana laye. Uzwe umuntu wakhona esekhuluma eklamasa anwebe lendebe sengathi ngumuntu oza lombiko ovela enduneni, ethi ibhoyi lami ngilikhombe indlela.
Isixwayiso sami sithi musa ukuthanda ukuqhatsha nxa ubona ukuthi uyasilela, yazi ukuthi uNkulunkulu kathandi muntu ohlukuluza izidalwa zakhe. Ayixabene.
Mehleli Nkunziyembongolo Dube 0738305027.
