uMthunywa
Silo Ncekwenhle Ncube
SIZWE samantungwa lina ondlela zimhlophe babetsho beyinembe esikhonkosini abadala nxa bethi uthando luyahlakulelwa. Ngempela kunjalo nanku phela amadodadoda ethethe ithuba lawo izolo lokhu ngelanga lezithandani eleValentine enza konke okusemandleni awo ukujabulisa osomoya babo.
Phela uthando ludinga inhliziyo ezikwaziyo ukubekezela lokuzithiba sizwe esilohlonzi. Kwakungihlabe umxhele nxa amaphephandaba ebika ukuthi uzibanibanyana ugamule isithandwa sakhe noma ‘‘uqunge umkakhe ngamafutha atshisayo’’ kubangwa into engelamsebenzi. Kambe kusaseluthando nxa kunjalo na?
Kwakube kuhle ukuzwa indaba kuthwa abaleminyaka engu-50 bavuselela umtshado wabo kakutsha. Angithi zindaba ezihlabusayo ke lezo othi uzizwa zikuthinte kwamancane.
Kule iviki ubungathandani edolobhoneni. Abasemathandweni bediyazela begcwala indawo yonke.
Bekuyisiphithiphithi omunye lomunye engena emavinkilini ethengela ubambo lwakhe isipho sokumupha ngosuku lweValentine’s ukuze ambonise ukuthi nguye yedwa ukhethiwe emhlambini. Lakanye amadoda uqobo awajabulisile amanina awo. Labathengisi bebececise izitolo zabo ngombala obomvu kubukeka kukhanga amehlo.
Abadala bathi okuncweba indlebe ngowakho yikho lami ngilithi nka! Udletshana madoda. Akusibo buphukuphuku majaha ukujabulisa omunye wakho ngelanga lothando. Ngangizwe ompondo kayintshintshwa bethi yikudliswa betsho bebopha inja lezikhuni. Inengi labo ngelitshaya abafazi ezindlini. Uthole umntanabantu secake sengokunye kungasakhanyi ingaphambili lengamuva.
Phela madoda sisuke silibale ukuthi umntanabantu uyabe umqomise eyimbumbuluzi etshelela engumkhangandoda. Kanti khona kubi ngaphi ukuthengela lowo othi ngowakho isicathulo esitsha? Angithi yikho ukomela khonokho osekwaze kwasinika igama lokuthi singompondo kayintshitshwa. Singakuvumeli ukomela bakaNdaba nxa ikhona ethengayo asizijabuliseni izithandwa zethu.
Abanye obaba bahle bafelwa ngomakhalekhukhwini ngempelaviki yikho elunga namuhla ngobugwala bokuthenga izipho. Kengilitshele indaba eyimfihlo, ungayekela ukumjabulisa bazakujabulisela abanye abangawomeliyo njengawe. Angitshongo ukuthi lina bomanqwethela imiziyabantu beselisiyadiliza imitshado
yabantu ngezipho zenu. Qomisani ezenu intombi lizikholisise aze ahawukele umakhelwane.
Lingathi angilitshelanga madoda, omama laba ngabantu abathanda ukuphiwa isikhathi sabo njalo bazizwe bethandekile. Benjalo nje ngabantu abathanda ukubonakala ukuthi basemathandweni. Kulabo abathengele izithandwa zabo okuhle ngelanga lezithandwa ngilitshayela ihlombe lenze umsebenzi omuhle ngiyafunga kule iviki lizadla okumnandi kodwa emakhaya enu. Besengithi kini elingakazihluphi ngokujabulisa abasizi
benu siphelile isikhathi azibotshwe sibenze behlale bebobotheka.
Kusenjalo nje ngikhuze laba asebephenduka ingqwele emakhaya. Unkosikazi ubhuqwa kuze kuse. Lalapho kungekho okubi akwenzileyo kumele adutshuzwe ngenduku. Kanti isintu sesayangaphi Mthwakazi omuhle.
Angithi nje ontshebe zimhlophe babelaya amajaha bethi induku ayiwakhi umuzi. Lakhathesi lokhe ingawakhi. Kambe ngumuzi bani okuhlala kugijinyiswana? Angithi umama kumele nje ahlale emamatheka ngothando ngoba ubaba ebabaza konke okuhle abamenzela khona egumeni ligcwalakazi lakhe.
Asibancomeni omama laba sibakhuthaze bezizwe beyingxenye yomuzi. Ngiyafunga ngiyagomela nxa unkosikazi ezizwa eqakathekiswa uzaba yindoda elomuzi oqinileyo. Isikhonkwane somuzi yikuthanda umsizi wakho. Ziqunywa amakhanda ziyekwe.
