uMthunywa
Silo Gladmore Ncube
BAKWETHU amasiko ethu athwele ubuntu bethu njalo yiwo asehlukanisayo labo ndlebe zikhany’ ilanga ngokuwalandela senze imikhuba eyayisenziwa ngokhokho bethu endulo.
Kulezinsuku abansundu sebewathatha kancane amasiko ethu ngokulandela impilo yabamhlophe abayibona kubomabonakude. Ezomdabuko akumelanga siziphathe njengembali ngoba umuntu ngumuntu ngamasiko akhe.
Abanye kunje bahlezi ngezinyembezi kuphela kukanti isisusa salokhu yikungananzwa kwezamasiko. Phela isiKhristu kasitsho ukuthi umuntu kalambali yakhe. Wonke umuntu ulamasiko omdabuko wakhe.
Ngalokhu kuhle bakwethu ukuthi sibambelele kwezamasiko loba nje inengi selingamakholwa. Usizi yikuthi abantu kungabanzima uthola sebebuyelele ezomdeni. Lakho phela umuntu engaphatha kubi ezamasiko kuzathi mhla esewabuyelela abaphansi bamhlamukele ngoba bezonde ukuhlala benganakekelwa.
Ukulandela amasiko kuqakathekile kakhulu ngoba kwesinye isikhathi labo abehluleka ukulandela amasiko bacina belandelwa zinkinga bagule okumangalisayo kodwa bengatholi usizo esibhedlela. Esikhathini esinengi abanje uyababona sebetshiya imisebenzi baphenduke ekhaya bazokwelatshwa ngokomdabuko.
Inkinga ezinengi ezifanana lalezi ziyabe zidalwa yikuthi umuntu uyabe elamadlozi kodwa esala ukuvuma, ewaphika eqina ngesiKhristu.
Amadlozi nxa ungaba lawo kuvame ukuthi esikhathini esinengi umuntu athwasiswe, nxa engawafuni ikhona indlela yamasiko elandelwayo hatshi nje ukwenza ngendlela engayisiyo yesintu. Ukulandela amasiko kuqakathekile kakhulu ngoba kwenza ukuthi umuntu azazi ukuthi yena ngowawuphi umdabuko.
Abanye njalo ngabakhala ngemikhuhlane etshiyeneyo kodwa bebambelele ekukholweni kusehlula ukuthi basile. Kuthi njalo abanye ngabakhala ngokungasebenzi, ukungendi kanye lokungathathi kodwa mihla yonke bevukela enkonzweni bephiwa imithandazo mihla yonke kodwa kungantshintshi lutho.
Yebo kambe bakaMthwakazi ukubambelela kwezamasiko akutsho ukuthi umuntu engasakhonzi. Usizi yikuthi abanye abantu abasakwazi ngitsho lokuthi kwenziwani nxa kuthe kwaba lohlupho emdenini.
Kambe bazakufunda njani njengoba labazali sebawalahla amasiko? Yikho phela othola ukuthi umntwana esesele eyedwa ahlutshwe ngabaphansi aswele ukuthi engakulungisa kanjani lokhu ngoba engazi lutho.
Ngeqiniso abanye bengakutshaya indiva lokhu engikuchazayo ngoba bengakwazi kodwa banengi abantwana abakhula bephiwe izibongo ezingayisizo zaboyise. Ekukhuleni kwabo loba bekhonza kanjani bahlupheka uzwe sokuthiwa batshelwe ukuthi kumele bayekibo kuyelungiswa ngoba bekhuliswe ngesibongo semzini.
Indaba ezinjalo sizizwa kusa kwamalanga njalo kwakuthi ngemva kokuba umuntu olohlupho lolu ebone abakibo kwalungiswa ngokwesintu aphile kuhle kakhulu ziphele indubo zonke. Yikho-ke okubonakala khona ukuthi amasiko aqakathekile bakwethu.
Aqakathekile amasiko ethu bazali singawakhohlwa, asiwalandeleni njalo sifundise abantwabethu ukuze kusasa bengasali emnyameni sebelenkinga nxa selingasekho kulo umhlaba. Ulwazi lolu asilufundisaneni singafi sifumbethe imfihlo sidliwe ngamagenga lalo.
